Вёска Гарадзішча
Вёска Гарадзішча знаходзіцца ў Дзмітравіцкім сельсавеце Камянецкага раёна, за 7 км на паўночны захад ад Камянца, 46 км ад Брэста. У канцы 17 ст. маёнтак і вёска ў Берасцейскім павеце і ваяводстве ВКЛ, дзейнічала драўляная ўніяцкая Петра-Паўлаўская царква (пабудавана ў 1698 г.). З 1795 г. ў складзе Расійскай імперыі. У сярэдзіне 19 ст. вёска і аднайменны маёнтак у Брэсцкім павеце Гродзенскай губерні, уладанне Матусевічаў. Згодна 8-й рэвізіі (1833) у вёсцы 17 двароў, 79 рэвізскіх душ. У 1841 г. гарадзішчанскі прыход ліквідаваны, царква і вёска прыпісаны да малаельскага прыходу Пакроўскай царквы. У 1858 г. царква зачынена з-за аварыйнага стану, у 1864 г. Петра-Паўлаўскі храм адноўлены зноў як прыпісны да малаельскага прыходу.
Свята-Петра-Паўлаўская царква ў ГарадзішчыФота © Кузіч Мікола | Дата: 02/12/2006
У 1885 г. сяло ў Войскай воласці Брэсцкага павета, 13 двароў, 119 жыхароў. Паводле перапісу 1897 г. сяло, 21 двор, 155 жыхароў, і выселак — 1 двор, 7 жыхароў; маёнтак Азярніцкіх (Jeziernicki) — 2 двары, 18 жыхароў. У 1905 г. ў сяле — 176 жыхароў, царкоўная школа (з 1890 г.), хлебазапасны магазін, ветраны млын, кузня, у маёнтку — З жыхары.
У 1921—39 гг. вёска і фальварак, спачатку ў Войскай, а з 3.3.1928 г. ў Дзмітравіцкай гмінах Брэсцкага павета Палескага ваяводства Польшчы. У 1923 г. ў вёсцы — 21 двор, 94 жыхары; у фальварку (уладальнік Марыя Азярніцкая) — 2 двары, 15 жыхароў. У 1940 г. ў вёсцы 31 двор, 271 жыхар. З 12.10.1940 г. ў Агародніцкім сельсавеце Камянецкага раёна Брэсцкай вобласці БССР. З 1950 г. дзейнічаў калгас «Савецкая Беларусь». З 11.4.1964 г. ў Дзмітравіцкім сельсавеце, у саўгасе імя Дзімітрава. У 1960 г. ў вёсцы 176 жыхароў, у 2005 г. - 28 жыхароў. На вясковых могілках захаваўся помнік народнага дойлідства - драўляная Петра-Паўлаўская царква (XVIII-XIX стст.).
Літ.:
Гарады і вёскі Беларусі, Энцыклапедыя, Том 4
БРЭСЦКАЯ ВОБЛАСЦЬ, кніга ІI
Мінск, «БЕЛАРУСКАЯ ЭНЦЫКЛАПЕДЫЯ», 2007