Крынкі - фота і помнікі

Вёска Крынкі

Вёска Крынкі знаходзіцца ў Воўчынскім сельсавеце Камянецкага раёна, за 59 км на паўднёвы захад ад Камянца, 51 км ад Брэста. Раней вёска стаяла на самым беразе ракі Заходні Буг. Аднак пасля Другой сусветнай вайны Крынкі, як і ўсе іншыя вёскі на тэрыторыі БССР, прылеглыя да дзяржаўнай мяжы, была перасунута ўглыб тэрыторыі. Так сучасная вёска Крынкі знаходзіцца за 1,5 км на паўночны ўсход ад яе спрадвечнага месцазнаходжання. Цяпер на яе месцы праходзіць ахоўная памежная паласа.

1767 г. па фундацыі князя Адама Чартарыйскага ў Крынках узведзена драўляная царква Святога Мікалая, пры пабудове - ўніяцкая, з 1839 г. - праваслаўная. У 2-й палове 19 ст. сяло Крынкі ў Воўчынскай воласці Брэсцкага павета Гродзенскай губерні Расійскай імперыі. У 1857 г. адносілася да маёнтка Ставы, 107 рэвізскіх душ, уласнасць графіні Красінскай. У 1885 г. ў сяле 15 двароў, 120 жыхароў, царква, школа. Паводле перапісу 1897 г. ў сяле 21 двор, 139 жыхароў, народнае вучылішча. Побач знаходзіліся аднайменны дзяржаўны маёнтак, 2 двары, 5 жыхароў, і сядзіба царкоўнага прычту, 2 двары, 13 жыхароў. На 1905 г. ў сяле 188 жыхароў.

У  1921—39 гг. Крынкі ў складзе гміны Воўчын Брэсцкага павета Палескага ваяводства Польшчы. На захадзе Крынак паміж вёскай і мястэчкам Няміраў праходзіла мяжа паміж Беластоцкім і Палескім ваяводствамі. У 1940 г. — 196 жыхароў, кааператыўная крама. З 12.10.1940 г. вёска ў Навасёлкаўскім сельсавеце Высокаўскага раёна Брэсцкай вобласці БССР. У Другую сусветную вайну на франтах загінулі 3 жыхары вёскі. Пасля вайны вёска разам з усімі пабудовамі перасунута на 1,5 км далей ад дзяржаўнай мяжы. Тады ж была старачана і Мікалаеўская царква. У час пасляваеннай калектывізацыі ў вёсцы арганізаваны калгас «Чырвоны араты». З 16.7.1954 г. ў Воўчынскім сельсавеце. З 17.4.1962 г. ў Камянецкім раёне. У Крынках у 1960 г. — 81, у 1970 г. — 58, ў 2005 г. - б жыхароў. Вёска знаходзіцца ў памежнай зоне, для наведвання трэба атрымаць дазвол у Памежным камітэце Беларусі.

Літ:
1. Гарады і вёскі Беларусі, Энцыклапедыя, Том 4 
БРЭСЦКАЯ ВОБЛАСЦЬ, кніга ІI 
Мінск, «БЕЛАРУСКАЯ ЭНЦЫКЛАПЕДЫЯ», 2007
2. Гродненский православный календарь
Православие в Брестско-Гродненской земле в конце ХІХ века, Том 1
Воронеж, 1899