> Брэсцкая вобласць > Камянецкі раён > вёска Шышова
Шышова. Царква Успення Прасвятой Багародзіцы

Шышова - фота і помнікі

Першая пісьмовая згадка: 1577

Магчымыя варыянты:
Шышова Шишово Szyszewo Šyšova Шышава Szyszowo Szyszowa Shyshovo Shyshova Shyshowa Shyshowo

Каардынаты:
52° 27'13.44"N, 23° 53'0.69"E

Што паглядзець у Шышове

Шышова

Вёска Шышова знаходзіцца ў Навіцкавіцкім сельсавеце Камянецкага раёна, за 10 км на паўночны ўсход ад Камянца. Паводле пісьмовых крыніц вядома з 16 ст. як паселішча ў Берасцейскім павеце Трокскага ваяводства ВКЛ. Пад 1577 г. пазначана як дзяржаўны маёнтак у актах Берасцейскага гродскага суда. У 2-й палове 17 ст. сяло і маёнтак у Берасцейскім павеце Берасцейскага ваяводства ВКЛ, належалі жонцы скарбніка Падольскага Фядоры Тышкоўскай. У 1685 г. яна фундавала будаўніцтва ўніяцкай Ўспенскай царквы, на ўтрыманне святара запісала 1,5 валокі зямлі, а таксама сенакосы і агароды пры сядзібе. З 1839 г. царква праваслаўная, ў 1877 г. пабудавана новая царква. У сярэдзіне 19 ст. сяло Шышова ў Дзмітравіцкай воласці Брэсцкага павета Гродзенскай губерні Расійскай імперыі. Паводле перапісу 1897 г. ў сяле 54 двары, 399 жыхароў, царква Успення Прасвятой Багародзіцы, хлебазапасны магазін, карчма. Непадалёк знаходзіўся аднайменны маёнтак, уладанне памешчыка Вікенція Матушэвіча, 3 двары, 35 жыхароў. У 1905 г. ў сяле 420 жыхароў, дзейнічала народнае вучылішча (75 вучняў).

Шышова - Царква Успення Прасвятой Багародзіцы

Успенская царква ў ШышовеФота © А. Дыбоўскі (http://globus.tut.by) | Дата: 04/2007

У 1921-39 гг. вёска і фальварак (уласнасць Уладзіслава Матушэвіча) у складзе Дзмітравіцкай гміны Брэсцкага павета Палескага ваяводства Польшчы. У 1923 г. ў вёсцы 52 двары, 264 жыхары (255 праваслаўных, 9 каталікоў). Жыхары адносіліся да праваслаўнага прыходу ў Пашуках і касцёла Святых Пятра і Паўла ў Камянцы. У 1940 г. ў вёска (77 двароў, 454 жыхары) і хутар (3 двары, 15 жыхароў). З 12.10.1940 г. ў Навіцкавіцкім сельсавеце Камянецкага раёна Брэсцкай вобласці БССР. У Другую сусветную вайну на франтах загінулі 8 вяскоўцаў. З 16.7.1954 г. ў Пашукоўскім, з 15.1.1962 г. зноў у Навіцкавіцкім сельсавеце. У Шышове ў 1960 г. — 300, у 1970 г. — 231, у 2005 г. - 76 жыхароў. У Шышове захаваўся помнік народнага дойлідства - царква Успення Прасвятой Багародзіцы (1877 г.).

Літ.:
Гарады і вёскі Беларусі, Энцыклапедыя, Том 4 
БРЭСЦКАЯ ВОБЛАСЦЬ, кніга ІI 
Мінск, «БЕЛАРУСКАЯ ЭНЦЫКЛАПЕДЫЯ», 2007