> Брэсцкая вобласць > Жабінкаўскі раён > горад Жабінка > Царква Покрыва Прасвятой Багародзіцы
Жабінка. Царква Покрыва Прасвятой Багародзіцы
Жабінка. Царква Покрыва Прасвятой Багародзіцы

Царква Покрыва Прасвятой Багародзіцы | Жабінка

Год пабудовы (перабудовы): 1885
Каардынаты:
52° 11'43.14"N, 23° 59'35.78"E

Фотагалерэі

Выбраныя здымкі

Жабінка. Царква Покрыва Прасвятой Багародзіцы

Галоўны фасад Фота © К. Шастоўскі |

Жабінка. Царква Покрыва Прасвятой Багародзіцы

Бакавы фасад Фота © К. Шастоўскі |

Жабінка. Царква Покрыва Прасвятой Багародзіцы

Від з боку апсіды Фота © К. Шастоўскі |

Царква размешчана паміж горадам і жылым пасёлкам цукровага завода (былая вёска Мышчыцы), на скрыжаванні дарог, па сучаснай вул. Камсамольскай. Храм пабудаваны з драўлянага бруса на мураваным цокалі ў 1885 г., звонку ашаляваны дошкамі. Храм манументальны, даволі высокі, але кампактны па сваіх прапорцыях, вылучаюцца высокая званіца і купал.

У плане храм сіметрычнай формы, складаецца з некалькіх частак: асноўнага аб'ёму, апсіды з рызніцамі па баках і прытвора з тамбурам. Галоўная частка — гэта асноўны аб'ём храма, ён прамавугольны ў плане, пакрыты чатырохсхільным дахам. У цэнтры даха асноўнага аб'ёму невысокі паўсферычны купал на васьмігранным светлавым барабане, грані праз адну прарэзаны прамавугольнымі вокнамі. З захаду да асноўнага аб'ёму далучаецца пяцісценная апсіда з двума высокімі рызніцамі па баках. Апсіда накрыта трохсхільным дахам, а рызніцы — аднасхільнымі. Рызніцы маюць па аднаму акну. Па баках асноўнага аб'ёму храма прыбудаваны два невялікіх прытвора, праз якія ажыццяўляюцца бакавыя ўваходы ў храм. Бакавыя сцены прарэзаны двума (па кожнай сцяне) высокімі аконнымі праёмамі з арачнымі завяршэннямі. Цікавую кампазіцыю мае заходняя частка храма, якая з захаду далучаецца да асноўнага аб'ёму. Заходняя частка складаецца з двух аб'ёмаў: шырокага прытвора (з двума службовымі памяшканнямі ў інтэр'еры) і тамбура, завершанага трохвугольным франтонам, які абапіраецца на пілястры. У адным са службовых памяшканняў размяшчаецца драўляная лесвіца, што вядзе на званіцу. У цэнтры прытвора — высокі дзвярны праём з паўцыркулярным завяршэннем, — гэта цэнтральны, галоўны ўваход у храм. Прытвор з'яўляецца асновай двух'яруснай васьміграннай вежы-званіцы. Яе шырокія грані чаргуюцца з вузкімі і маюць арачныя праёмы, завершана вежа васьмігранным купалам з макаўкай.

Вонкавая дэкаратыўная аздоба храма, якая вырашана разнымі драўлянымі дэталямі, надае ўсёй пабудове ўрачысты характар. Элементы дэкаратыўнай аздобы ўзяты з арсеналу класічнай архітэктуры, але ў канцы XIX ст. яны набылі скажоныя формы, якія характэрны для неакласіцызму. Дэкаратыўны малюнак мае гарызантальная шалёўка знешніх сцен храма. Асноўны аб'ём завершаны складаным разьбяным карнізам, у якім размешчаны невялікія разьбяныя брусы — кранштэйны. Пад карнізам праходзіць дэкаратыўны пояс з фігурнымі разьбянымі дэталямі. Усе вуглы храма ўмацаваны пілястрамі, якія маюць своеасаблівыя капітэлі. Усе дэкаратыўныя дэталі, выкананыя з высокім майстэрствам і якасцю, раскрываюць асаблівасці стыля неакласіцызму. Палатно ўваходных дзвярэй дэкаравана шырокімі філёнгамі. Да кожнага дзвярнога праёма (бакавых і цэнтральнага) вядзе шырокі мураваны ганак.

У інтэр'еры выдзяляецца двух'ярусны драўляны разьбяны іканастас, які аддзяляе алтарную частку ад асноўнага аб'ёму храма. Першы ярус іканастаса — мясцовы рад. Цэнтрам яго кампазіцыі з'яўляюцца царскія вароты, якія вылучаюцца ажурнай драўлянай разьбой.

У інтэр'еры храма цікавым з'яўляюцца маляваныя 12 кампазіцый з жыцця Ісуса Хрыста ("Новы Запавет"), якія размешчаны па ўсяму перыметру храма (па бакавых сценах і супраць іканастаса). Яны зроблены мясцовымі майстрамі да 100-годдзя існавання храма (1985 г.), і хаця не маюць высокай мастацкай якасці, але яскрава паказваюць карціны "Новага Запавету".

Крыніца:
Т.І. Чарняўская
Памяць, Жабінкаўскі раён.
Мінск, Ураджай, 1999