Крыўляны - фота і помнікі

Гісторыя Крыўлянаў

Першая пісьмовая звестка адносіцца да 16.04.1589 г., калі сяло Крыўляны (у дакуменце названа «вуліца, празываемая Крывое») было ўласнасцю Ф. Л. Пацея, належала да Каралеўскага маёнтка. У XVII ст. Сяло было пад уладаю Пацеяў і Садоўскіх. Напрыканцы XVIII ст. мелі 18 валокаў ворыва (384 га). Захаваўся інвентар ад 1787 г.

У 1812 г. Крыўляны належалі князю Адаму Чартарыйскаму, уваходзілі ў склад Рэчыцкага ключа, жылі 107 сялян. З 1866 г. вёска стала цэнтрам сялянскага таварыства Мураўёўскай воласці Пружанскага павета. У ёй налічвалася 212 жыхароў. Да 1905 г. колькасць насельнікаў павялічылася ўдвая і склала 440 чалавек. У 1935 г. у Крыўлянах 64 двары, 369 жыхароў, школа.

16.07.1954 г. утвораны Крыўлянскі сельсавет Жабінкаўскага раёна (у 1959-1962 гг. — у Камянецкім, у 1962-1966 гг. — у Кобрынскім, з 30.07.1966 г. — зноў у Жабінкаўскім раёне). На 1.01.1970 г. вёска складалася з 92 двароў і 300 жыхароў. У 1998 г. з'яўлялася цэнтрам калгаса «Світанак», мела 147 двароў, 399 жыхароў, сярэднюю школу (з 1975 г.), клуб, дзіцячы садок, бібліятэку, аддзяленне сувязі і інш. У Крыўлянах нарадзіўся З. З. Кавальчук (1893 г.), дзеяч прафсаюзнага руху.

Літ.:
А. Р. Бензярук
Памяць. Жабінкаўскі раён
Мінск, Ураджай, 1999

Апублікавана з ласкавай згоды аўтара Анатоля Бензярука