Вішнявец (Гавязна) - фота і помнікі

Гісторыя Вішняўца

Вішнявец (да 1964 г. Гавязна 2-е), вёска ў Стаўбцоўскім раёне. За 17 км на Пд ад Стоўбцаў, на шашы Стоўбцы — Нясвіж. 661 жыхароў, 212 двароў (1992).

У сярэдзіне 18 ст. побач з в. Гавязна (цяпер в. Навапольцы) і маёнткам заснавана мяст. Гавязна. У 1742 г. бенедыкцінкамі тут пастаўлена ўніяцкая царква, якая ў 1850 г. перабудавана пад праваслаўную. У 1773 г. у мястэчку 17 двароў, у 1801 — 19 двароў.

Пасля 2-га падзелу Рэчы Паспалітай (1793 г.) у складзе Расейскай імперыі ў Слуцкім павеце. У 1845 г. адкрыта народнае вучылішча, у якім у 1892/93 навучальным годзе займаліся 44 хлопчыкі, у 1905/06 — 110 хлопчыкаў і 10 дзяўчынак. У 19 — пач. 20 ст. цэнтр Гавязненскай воласці Слуцкага павета. У 1861 г. - 138 жыхароў, 18 двароў, у 1880 г. — 144 жыхароў, 20 двароў, валасная ўправа, плябанія, карчма, штогадовы кірмаш; у 1897 г. — 215 жыхароў, 31 двор, у 1908 г. — 216 жыхароў, 25 двароў. 3 29.7.1920 г. цэнтр воласці Нясвіжскага павета. 3 1921 у складзе Польшчы, цэнтр гміны Навагрудскага ваяводзтва. У верасні 1921 г. — 257 жыхароў, 46 двароў. 3 1939 г. у складзе БССР, з 12.10.1940 цэнтр сельсавета Стаўбцоўскага раёна. У чэрвені 1941 г. — чэрвені 1944 г. акупавана ням.-фаш. захопнікамі. У 1964 в. Гавязна 2-е перайменавана ў Вішнявец. У 1970 г. - 307 жыхароў, 87 двароў.

Помнік архітэктуры — царква Іаана Прадцечы 18 ст. Помнік землякам, якія загінулі ў 2-ю сусветную вайну.

Крыніца:
В. У. Шаблюк
Энцыклапедыя гісторыі Беларусі. Т.2.
Мінск, "Беларуская Энцыклапедыя", 1994