Вёска Яцкавічы
Вёска Яцкавічы знаходзіцца ў Лышчыцкім сельсавеце, за 30 км на паўночны захад ад Брэста. Паводле пісьмовых крыніц вёска вядома з 16 ст. як сяло — цэнтр войтаўства ў Берасцейскім старостве ВКЛ. У 1566 г. ў сяле налічваліся 22 дымы, яго прыбытак складаў 30 коп грошаў. У 19 ст. ў Брэсцкім павеце Гродзенскай губерні інавалі вёскі Яцкавічы-1 і Яцкавічы-2. Побач знаходзіўся фальварак Чарвінцы, які разам з вёскай Яцкавічы-1 складаў аднайменны мёнтак і належаў розным уладальнікам. У фальварку размяшчалася карчма. На месцы былога фальварку на поўначы вёскі захаваліся фрагменты колішняга прысядзібнага парку.
Алея у былым прысядзібным паркуФота © Alexandr Kulecha
Вёска Яцкавічы-2 уваходзіла ў дзяржаўны маёнтак Марозавічы. У 1870 г. ў Яцкавічах-2 157 рэвізскіх душ. Паводле перапісу 1897 г. адна вёска Яцкавічы (110 двароў, 665 жыхароў), у Лышчыцкай воласці Брэсцкага павета. У 1905 г. у вёсцы 738 жыхароў. Паводле Рыжскага мірнага дагавора 1921 г. ў складзе Польшчы, у Лышчыцкай гміне Брэсцкага павета Палескага ваяводства. На 30.9.1921 г. у вёсцы 81 двор, 341 жыхар. Побач знаходзіліся фальваркі Чарвінцы і Ўлянова. З верасня 1939 г. ў БССР. У Другую сусветную вайну загінулі 13 жыхароў. Цяпер вёска знаходзіцца ў складзе сельска-гаспадарчага прадпрыемства «Астрамечава» (цэнтр — в. Лышчыцы); ёсць фельчарска-акушэрскі пункт, базавая школа, магазін, 169 гаспадарак і 413 жыхароў (2005 год).
Крыніца:
Гарады і вёскі Беларусі, Энцыклапедыя, Том З
БРЭСЦКАЯ ВОБЛАСЦЬ, кніга І
Мінск, «БЕЛАРУСКАЯ ЭНЦЫКЛАПЕДЫЯ», 2006