Кругель
Вёска Кругель знаходзіцца ў Ратайчыцкім сельсавеце, за 12 км на паўднёвы захад ад Камянца, 33 км ад Брэста. Згадваецца ў 2-й пал. XV ст. як сяло ў Камянецкай воласці Берасцейскага павета ВКЛ, кароль Казімір запісаў сяло Дашку Барубічу. У 1567 г. з маёнтка Кругель выстаўляліся коні і зброя для войска. У сярэдзіне XIX ст. сяло, былое шляхецкае ўладанне ў Ратайчыцкай воласці Брэсцкага павета Гродзенскай губерні Расійскай імперыі. Адносілася да маёнтка Кругель памешчыка Падгурскага. У 1857 г. ў вёсцы 90 рэвізскіх душ. У 1885 г. — 12 двароў, 120 жыхароў, праваслаўная царква Святога Духа, карчма. Паводле перапісу 1897 г. сяло ў складзе Кругельскай сельскай грамады, 17 двароў, 126 жыхароў, карчма, хлебазапасны магазін. Непадалёк знаходзіўся аднайменны маёнтак Браніслава Падгурскага, які валодаў 505 дзесяцінамі ворыўнай зямлі, у маёнтку працаваў паравы млын. У 1905 г. ў сяле 156 жыхароў, нар. вучылішча (73 вучні). У чэрвені 1906 г. сяляне маёнтка арганізавалі стачку.
Стары двор у КругеліФота да 1930 г.
У 1921—39 гг. Кругель ў складзе Ратайчыцкай гміны Брэсцкага павета Палескага ваяводства Польшчы. У 1923 г. вёска (17 двароў, 95 жыхароў) і фальварак Яніны Падгурскай (1 двор, 27 жыхароў). У 1940 г. — 27 двароў, 180 жыхароў. З 12.10.1940 г. вёска ў Ратайчыцкім сельсавеце Камянецкага раёна Брэсцкай вобласці БССР. У Другую сусветную вайну на франтах загінулі 8 жыхароў вёскі. У 1960 г. ў вёсцы 174, у 2005 г. - 12 жыхароў. Вёска — радзіма беларускага пісьменніка У.В.Гніламёдава.
Літ.:
Гарады і вёскі Беларусі, Энцыклапедыя, Том 4
БРЭСЦКАЯ ВОБЛАСЦЬ, кніга ІI
Мінск, «БЕЛАРУСКАЯ ЭНЦЫКЛАПЕДЫЯ», 2007