> Брэсцкая вобласць > Камянецкі раён > вёска Паніквы

Паніквы на мапе

Паніквы - фота і помнікі

Першая пісьмовая згадка: 1533

Магчымыя варыянты:
Паніквы Паниквы Ponikwy Panikvy Panikwy Ponikwa Panikvy Пониквы

Каардынаты:
52° 17'14.16"N, 23° 14'40.71"E

Што паглядзець у Паніквах

Паніквы

Вёска Паніквы знаходзіцца ў Воўчынскім сельсавеце Камянецкага раёна, за 57 км на паўднёвы захад ад Камянца. Паводле пісьмовых крыніц вядомы з 16 ст. Пад 1533 г. пазначаны як уладанне Ваганоўскага. У 1631 г. фальварак Паніквы ў Берасцейскім павеце Берасцейскага ваяводства ВКЛ, уласнасць берасцейскіх езуітаў. Верагодна, на пачатку XVIII ст. езуіты пабудавалі ў Паніквах філіяльны касцёл, ці ўніяцкую царкву. У 1774 г. вёска і фальварак ва уласнасці езуітаў, пры фальварку меліся карчма і вінакурня. Пасля скасавання ордэну езуітаў і Ўніі царква ў праваслаўным ведамстве - ў Літоўскай епархіі. У 2-й палове 19 ст. сяло Паніквы ў Воўчынскай воласці Брэсцкага павета Гродзенскай губерні Расійскай імперыі, былое шляхецкае ўладанне. Паводле 10-й рэвізіі (1857) у складзе маёнтка Воўчын памешчыцы Пуслоўскай, 276 рэвізскіх душ. У 1885 г. — 40 двароў, 322 жыхары, драўляная Успенская царква. У 1897 г. адносіліся да Паніквенскай сельскай грамады, 54 двары, 516 жыхароў, праваслаўная царква, школа граматы. На пачатку ХХ ст. - сяло і фальварак Марачэўскіх (499 дзесяцін зямлі).

Паніквы - Царква Успення Прасвятой Багародзіцы

Успенская царква ў ПаніквахФота © Кузіч Мікола | Дата: 14/05/2011

У 1921-39 гг. вёска Паніквы ў складзе Воўчынскай гміны Брэсцкага павета Палескага ваяводства Польшчы. У 1924 г. - 73 двары, 311 жыхароў (299 праваслаўных, 8 каталікоў, 4 іудзея). У 1940 г. ў вёсцы 118 двароў, 558 жыхароў, пачатковая школа. З 12.10.1940 г. ў Навасёлкаўскім сельсавеце Высокаўскага раёна Брэсцкай вобласці БССР. У Другую сусветную вайну ў 1941-45 гг. на франтах загінулі 29 жыхароў вёскі. У пасляваенныя гады працавалі пачатковая школа (у 1948 г. - 45 вучняў), млын. З 16.7.1954 г. ў Воўчынскім сельсавеце. З 17.4.1962 г. ў Камянецкім раёне. У вёсцы ў 1960 г. - 456, у 1970 г. — 375, у 2005 г. - 204 жыхары. У Паніквах захаваўся помнік народнага драўлянага дойлідства - Свята-Успенская царква (XVIII-XIX стст.). Вёска знаходзіцца ў памежнай зоне, для наведвання патрэбна атрымаць дазвол з Памежнага камітэту Беларусі.

Літ.:
Гарады і вёскі Беларусі, Энцыклапедыя, Том 4 
БРЭСЦКАЯ ВОБЛАСЦЬ, кніга ІI 
Мінск, «БЕЛАРУСКАЯ ЭНЦЫКЛАПЕДЫЯ», 2007