> Брэсцкая вобласць > Жабінкаўскі раён > вёска Старое Сяло

Старое Сяло на мапе

Старое Сяло - фота і помнікі

Першая пісьмовая згадка: 1566

Магчымыя варыянты:
Старое Сяло Старое Село Stara Wieś Staroje Siało Staroe Staroye Selo Syelo Staroje Sialo

Каардынаты:
52° 5'4.89"N, 24° 5'57.33"E

Страчаная спадчына

Гісторыя Старога Сяла

На старонках дакументаў Старое Сяло сустракаецца з сярэдзіны XVI ст. Верагодны час заснавання — XV ст. Каля 1560 г. узнікла справа Р. Косці і С. Пуцанеўскага, са старасельцамі, якія адсудзілі сабе палі за Ляцаўцом і ракою Усцічоў. Згодна рэвізіі 1566 г., вёска з'яўлялася цэнтрам Старасельскага войтаўства Палескай воласці Берасцейскага староства.

20.11.1756 г. Аўгуст III перадаў прывілей на 17 валок у Старым Сяле К. Ляпарскаму. Генерал Зялевіч, які валодаў вёскай у апошнія часы Рэчы Паспалітай, новымі расейскімі ўладамі быў пазбаўлены маёнтка за прыхільнасць паўстанню 1794 г. Ягоныя правы (з 1795 г.) перададзены Л. I. Паліньяку.

У першай чвэрці XIX ст. адбываліся размежаванні Старога Сяла паміж Паліньякам і генерал-маёрам А. Я. Лангам. Загадам Аляксандра I маёнтак быў падараваны генералу П. К. фон Сухцеліну, а затым па купчай крэпасці перайшоў да жонкі А. Я. Ланга Наталлі. У 1816 г. у сяле жылі 52 чалавекі. З 1839 г. яно адышло да радзіны Мілачэўскіх.

У 1857 г. тут 90 двароў, 326 чалавек. У 1866 г. вёска стала цэнтрам аднайменнага сялянскага таварыства Азяцкай воласці (жылі 547 сялян). Маёнткам уладарылі Мілачэўскія і Задарноўскія. Працавалі цагельня, мукамольня, кузня, вятрак.

У 1897 г. налічвалася 137 двароў, дзе жыў 921 чалавек. Найбольшая колькасць насельніцтва была ў 1914 г., калі на 183 двары прыходзілася 1059 жыхароў, з іх 123 дзяцей школьнага ўзросту. 1.10.1911 г. адкрыта народнае вучылішча. У 1935 г. насельніцтва зменшылася да 892 чалавек.

12.10.1940 г. утвораны Старасельскі сельсавет Жабінкаўскага раёна. У чэрвені 1941 г. у Старасельскім лесе ўтварыўся адзін з першых партызанскіх атрадаў у Беларусі, які з мая 1943 г. назвалі ў гонар М. М. Чарнака (1911—1943 гг.), аднаго з заснавальнікаў атрада, ураджэнца Старога Сяла. Пасля вызвалення раёна у ліпені 1944 адноўлены Старасельскі сельсавет, які праіснаваў да 16.07.1954 г. У 1970 г. у Старым Сяле існавала 264 двары з 835 жыхарамі.

У сучаснай вёсцы 244 двары, дзе жывуць 535 чалавек, маюцца 9-гадовая школа, клуб, бібліятэка, медпункт, камбінат бытавога абслугоўвання.

Літ.:
А. Р. Бензярук
Памяць. Жабінкаўскі раён
Мінск, Ураджай, 1999

Апублікавана з ласкавай згоды аўтара Анатоля Бензярука