Ратуша | Чачэрск

Больш фотаздымкаў (7) >>

Помнік архітэктуры класіцызму з элементамі псеўдаготыкі. Пабудавана ў 2-й палове 18 ст. у цэнтры г. Чачэрск. Мураваны 2-павярховы квадратны ў плане цэнтрычны будынак, завершаны 5 драўлянымі чацверыковымі вежамі, 4 з якіх увянчаны шпілямі, размешчаны па вуглах асноўнага аб’ёму, 5-я (больш высокая і звужаная ўверсе) – пасярэдзіне на масіўным чацверыковым барабане. Вокны прамавугольныя, стральчатыя і з паўцыркульнымі арачнымі завяршэннямі. Карніз з фігурнымі кранштэйнамі.

Да 2 уваходаў па баках галоўнага фасада вядуць манументальныя каменныя лесвіцы. Паверхі маюць сіметрычную планіроўку: каля цэнтральнай квадратнай у плане залы згрупаваны па 4 прамавугольныя і круглыя ў плане памяшканні. У будынку знаходзілася адміністрацыйная ўстанова. Помнік рэспубліканскага значэння.

Крыніца:
Архітэктура Беларусі: Энцыкл. давед. / Беларус. Энцыкл.; Рэдкал.: А.А. Воінаў і інш. – Мінск: БелЭн, 1993. - С. 483