Касцёл Святога Мікалая | Геранёны

Больш фотаздымкаў (42) >>

Узведзены ў 1529 г. з цэглы па фундацыі ваяводы віленскага і канцлера ВКЛ Альбрэхта Гаштольда. У 1779 г. пасля пажару капітальна перабудаваны на сродкі Яна Пробача, зменена афармленне інтэр'ера; у 1883 г. да апсіды прыбудаваны 2 сіметрычныя сакрысціі і прытвор, рэканструяваны алтарная частка і фасады. Асобна ад храма стаяла 4-гранная званіца. Храм разам з замкам адлюстраваны на малюнку Н. Орды 1875—77 гг. Дзейнічае.

Пабудаваны ў стылі сціплага правінцыяльнага барока. Складаецца з прамавугольнага ў плане аб'ёму, 5-граннай апсіды з бакавымі нізкімі квадратнымі сакрысціямі і прытвора. Усе аб'ёмы накрыты 2-схільнымі дахамі, тарцы якіх закрыты прамавугольнымі шчытамі з 3-вугольнымі франтонамі. Яруснае нарастанне аб'ёмаў пераходзіць у дамінанту агульнай кампазіцыі — высокі атык галоўнага фасада. Плоскасныя фасады лаканічна крапаваны лапаткамі і прарэзаны лучковымі аконнымі праёмамі, апяразаны прафіляваным карнізам.

Зала касцёла злучана з абсідай арачным прасветам і перакрыта лучковым скляпеннем з арнаментальным роспісам. Алтары (цэнтральны і 2 бакавыя) выкананы ў стылі класіцызму. Цэнтральны алтар 2-ярусны, расчлянёны калонамі карынфскага ордэра і аформлены драўлянай паліхромнай скульптурай, гарэльефным і жывапісным абразамі («Укрыжаванне», «Узнясенне», «Бог Саваоф»). Другі ярус алтара запоўнены абразом «Св. Мікалай», завершаны фігурным шчытом са скульптурамі анёлаў. Паміж калонамі пастаўлены драўляныя скульптуры святых апосталаў Пятра і Паўла. Два бакавыя алтары па кампазіцыйнай будове і дэкоры аналагічны цэнтральнаму. Дэкор аргана (драўляная скульптура Давіда з гуслямі і анёлаў, накладная разьба) у стылі ракако. Сюжэтныя і арнаментальныя матывы размалёўкі сцен і арачных праёмаў выкананы ў 1934 г. мастаком Чарнецкім з Вільні ў стылі «другога ракако». У прасценках у арнаментальных медальёнах выявы евангелістаў. Канфігурацыя хораў захавала барочную крывалінейнасць.

Крыніца:
А.М. Кулагін
Каталіцкія храмы на Беларусі
Мінск, Беларуская Энцыклапедыя, 2000