> Мінская вобласць > Нясвіжскі раён > горад Нясвіж > Ратуша і гандлёвыя рады
Нясвіж. Ратуша і гандлёвыя рады
Нясвіж. Ратуша і гандлёвыя рады

Ратуша і гандлёвыя рады | Нясвіж

Выбраныя здымкі

Нясвіж. Ратуша і гандлёвыя рады

Ратуша і гандлёвыя рады Фота © К. Шастоўскі |

Нясвіж. Ратуша і гандлёвыя рады

Фота © К. Шастоўскі |

Нясвіж. Ратуша і гандлёвыя рады

Агульны выгляд Фота © К. Шастоўскі |

Нясвіжская гарадская ратуша з прылягаючымі да яе гандлёвымі радамі размешчаны на цэнтральнай адміністрацыйнай плошчы Нясвіжа і надаюць забудове горада непаўторны каларыт. Першыя будынкі ўзведзены да 1596 г. на галоўным рынкавым пляцу. Тут размяшчаўся гарадскі магістрат і іншыя гарадскія ўстановы. У 1762 г. комплекс перабудаваны ў стылі барока. У час пажару ў 1836 г. на будынку ратушы было знішчана завяршэнне вежы, якое больш не аднаўлялася. У апошнія гады праведзена рэканструкцыя і ратуша набыла сваё гістарычнае аблічча.

Двухпавярховы будынак ратушы прамавугольны ў плане, на тарцовым паўночным фасадзе мае высокую шасціярусную вежу над уваходам. Чатыры ніжнія ярусы чацверыковыя, 2 верхнія — васьмерыковыя ў плане. Вежа завяршаецца гранёным купалам з галоўкай. Пасля перабудовы ў сярэдзіне 17 ст. вежа стала чатырох’ярусная, была накрыта шатровым дахам. Двухпавярховы будынак ратушы амаль пазбаўлены дэкору. Сцены прарэзаны невялікімі прамавугольнымі аконнымі праёмамі і завершаны тонкім прафіляваным карнізам. Высокі двухсхільны дах з вальмам на тыльным тарцы зрокава павялічвае аб'ём будынка.

Аднапавярховыя мураваныя гандлёвыя рады спачатку былі размешчаны ўздоўж бакавых фасадаў на даўжыню будынка. Тарцовыя фасады ратушы былі звязаны з гандлёвымі радамі арачнымі праездамі з брамамі. Гандлёвыя рады (крамы) мелі выхад ва ўнутраныя дворыкі і ў бок арачных праездаў. Вонкавыя фасады гандлёвых радоў былі прарэзаны невялікімі аконнымі праёмамі.

У сярэдзіне 17 ст. гандлёвыя рады падоўжаны за бакавыя фасады, акружылі будынак з трох бакоў, утвараючы ўнутраны прамавугольны дворык. Захаваліся 2 праезды ў дворык з боку галоўнага тарцовага фасаду ратушы. Уваход у крамы з боку плошчы і прылеглых вуліц. Сцены гандлёвых радоў прарэзаны арачнымі праёмамі, паміж якімі рытмічна размешчаны шырокія лапаткі. Сцены завершаны высокім атыкам з тонкім карнізным паяском. Над кожным арачным праёмам прамавугольныя нішы. Дах аднасхільны, са схілам у бок двара.

Першапачаткова на першым паверсе ратушы знаходзіліся адміністрацыйныя памяшканні магістрата і суда, на другім паверсе вялікая зала для ўрачыстых грамадзянскіх актаў і тэатральных паказаў. Зала мела скляпеністае перакрыцце; да яе з боку галоўнага ўваходу вяла шырокая аднамаршавая лесвіца.

Ратуша — помнік архітэктуры 16—17 ст., у якім спалучаюцца рысы архітэктуры рэнесансу і барока. Пасля рэканструкцыі ў будынку ратушы зрабілі музей горада.

Крыніца:
Т.І. Чарняўская
Памяць. Нясвіжскі раён
Мінск, Белта, 2002

Год пабудовы (перабудовы): 1586 (1), 1752 (2), 1836 (2), 20
Каардынаты:
53° 13'8.42"N, 26° 40'52.25"E

Фотагалерэі