Трасцяніца - фота і помнікі

Трасцяніца

Вёска Трасцяніца знаходзіцца ў Ратайчыцкім сельсавеце Камянецкага раёна, за 19 км на паўднёвы захад ад Камянца. У 2-й палове XV ст. сяло ў Берасцейскім павеце ВКЛ, уласнасць Сангушкаў. У 1582 г. маёнтак Трасцяніца. У сярэдзіне 19 ст. вёска і аднайменны маёнтак у Брэсцкім павеце Гродзенскай губерні Расійскай імперыі. Паводле інвентара 1845 г. маёнтак - уласнасць Патоцкіх, 5045 дзесяцін зямлі. У склад маёнтка ўваходзілі фальваркі Трасцяніца, Алешкавічы, Бучамля, Гуркі. Дзейнічалі карчма, 3 млыны, піваварны і вінакурны заводы. Да фальварка Трасцяніца адносіліся вёскі Ратайчыцы, Рудавец, Ніўкі, 642 дзесяцін зямлі. У канцы 19 ст. ў Ратайчыцкай воласці Брэсцкага павета.

Праабражэнская царква ў ТрасцяніцыФота © К. Шастоўскі | Дата: 09/07/2005

У 1873 г. ў пагосце Трасцяніца пабудавана драўляная Спаса-Праабражэнская царква, у 1877 г. на вясковых могілках узведзена царква Святога Дзмітрыя. Паводле перапісу 1897 г. ў вёсцы 3 гаспадаркі, 15 жыхароў. На пачатку 20 ст. маёнтак належаў барону КМ.Корфу, які валодаў 866 дзесяцінамі зямлі. У маёнтку мелася каталіцкая капліца, філія брэсцкага парафіяльнага касцёла. У 1905 г. ў сяле 24 жыхары, у маёнтку — 72 жыхары. Летам 1906 г. ў маёнтку адбываліся сялянскія хваляванні.

Былая Дзмітрыеўская царква на могілках у Трасцяніцы.
Зруйнавана каля 2014 г.Фота © К. Шастоўскі | Дата: 09/07/2005

У 1921-39 гг. Трасцяніца ў складзе Ратайчыцкай гміны Брэсцкага павета Палескага ваяводства Польшчы. У 1923 г. - 39 гаспадарак, 219 жыхароў (усе праваслаўныя). У 1940 г. ў вёсцы 75 двароў, 421 жыхар. З 12.10.1940 г. ў Ратайчыцкім сельсавеце Камянецкага раёна Брэсцкай вобласці БССР. На франтах загінулі і прапалі без вестак 24 жыхары вёскі. У 1948 г. ў пачатковай школе было 72 вучні. У Трасцяніцы ў 1960 г. - 245, у 1970г. - 218, у 2005 г. - 90 жыхароў. У вёсцы захаваўся помнік народнага дойлідства - прыхадская Праабражэнская царква. Да 2015 г. на могілках стаяла паўзруйнаваная царква Святога Дзмітрыя.

Літ.:
Гарады і вёскі Беларусі, Энцыклапедыя, Том 4 
БРЭСЦКАЯ ВОБЛАСЦЬ, кніга ІI 
Мінск, «БЕЛАРУСКАЯ ЭНЦЫКЛАПЕДЫЯ», 2007