Гісторыя Малых Жухавічаў
Малыя Жухавічы, вёска ў сельсавеце, цэнтр калгаса імя Жалезняковіча. Тут стваралася Малажухавіцкае Евангелле — помнік старабеларускага рукапіснага кнігапісання канца XV — пачатку XVI ст.У XVII-XVIII стст. Малыя Жухавічы — сяло Навагрудскага павета. У 1683 г. налічвала 25 дымоў. Належала смаленскаму стольніку Карлінскаму. У 1777 г. — 34 дымы і карчма. У 1783 г. пабудавана драўляная царква Іаана Прадцечы. Царква мела 25 дзесяцін зямлі, дзейнічала царкоўна-прыходская школа. У 1799 г. у Малых Жухавічах 49 дымоў.
У XIX — пачатку XX ст. вёска ў Жухавіцкай воласці Навагрудскага павета Мінскай губерні Расейскай імперыі. У 1880 г. 53 двары, 400 жыхароў, 449 дзесяцін надзельнай зямлі. Акрамя таго, 71 дзесяціна выгану ў агульным карыстанні з памешчыкам маёнтку Жухавічы. У 1864 г. пабудавана новая царква.
У 1880 г. адкрыта школа пісьменнасці, потым ператворана ў царкоўна-прыходскую. У 1885 г. 53 двары, 400 жыхароў. У наваколлі 2 маёнткі.
З сакавіка 1918 г. уваходзіць у склад абвешчанай БНР. З 1921 г. адносілася да Жухавіцкай гміны Нясвіжскага павета, а з 1926 г. Стаўбцоўскага павета Навагрудскага ваяводства Польшчы. Малыя Жухавічы з'яўляліся адміністрацыйным цэнтрам гміны. Тут размяшчалася гмінная ўправа і паліцэйскі ўчастак. У верасні 1921 г. 129 жылых будынкаў, 684 жыхары. Польская пачатковая школа ў канцы 20-х гадоў закрыта. У 1940 г. вёска (164 двары, 915 жыхароў) у Жухавіцкім сельсавеце Мірскага раёна, з 17.12.1956 г. Карэліцкага раёна Баранавіцкай, а потым Гродзенскай вобласці БССР. У другую сусветную вайну загінулі 20 жыхароў вёскі. 12.3.1946 г. створаны калгас «Перамога», з сакавіка 1979 г. вёска цэнтр калгаса імя Жалезняковіча.
У Малых Жухавічах маецца гандлёвы цэнтр, паштовае аддзяленне, царква. На 1.1.2000 г. 292 двары, 724 жыхары.
Крыніца:
Памяць. Карэліцкі раён
Мінск. Белта. 2000