Касцёл Найсвяцейшай Панны Марыі | Вялікая Сэрвач

Касцёл у Вялікай Сэрвачы

Касцёл пад тытулам Найсвяцейшай Марыі Панны ў маёнтку Сэрвач быў заснаваны 7 верасня 1617г. па фундацыі Яна Бжастоўскага і Рафала Сулістроўскага як філія касцёла Беззаганнага Пачацця Панны Марыі ў Касцяневічах. У 1852г. на сродкі Яна Напалеона Козел-Паклеўскага быў узведзены новы будынак касцёла. Драўляны храм уяуляў сабой 3-зрубавы аб'ём з закрыстыяй справа ад 5-граннай апсіды. Цікава, што кожнае рабро алтарнай часткі пазначалася круглай напаўкалонай. Над бабінцам узвышалася чацверыковая, пад 4-схільным дахам, вежа-званіца. Касцёл быў накрыты 2-схільным гонтавым дахам з вальмамі над прэзбітэрыем.

Касцёл Найсвяцейшай Панны Марыі ў Вялікай Сэрвачы на здымку канца 19 ст.Фота: ca. 1900

Пасля Другой сусветнай вайны касцёл у Сэрвачы зачынілі. У 1950-я гг. будынак святыні разабралі і перавезлі на клуб у Давыдкі. На новым месцы зруб сабралі такім самым, якім ён быў і ў Сэрвачы, але ў двухпавярховым, атынкаваным звонку і ўнутры, пад агульным двухсхільным дахам будынка клуба святыню цяжка было пазнаць.

Клуб у Давыдках - былы сэрвацкі касцёл. Зруйнаваны ў 2012 г.Фота © Денис Канецкий | Дата: 2010

У 2010 г. клуб быў спалены і пазней зруйнаваны. Цяпер на гэтым месцы пастаўлены высокі металічны крыж. Усталяваны крыж і на ўзгорку ў Сэрвачы, там, дзе калісьці ўзвышаўся касцёл.

Крыніца:
Аляксей Яроменка
Каталіцкія святыні. Т.1, Мінск, Про Хрысто, 2003