Стараверская царква ў Кублішчыне
Дакладных звестак аб часе заснавання стараверскай абшчыны ў Кублішчыне не знойдзена. Дзеючая царква святой Тройцы была збудаваная ў 1905 г. Але стараверы мелі свой храм і раней. Праўда, цяжка вызначыць, калі ён быў збудаваны. У архівах удалося адшукаць толькі звесткі аб яго існаванні. А менавіта: „Пажарам, быўшым у 1882 г. у в. Кублішчына датла была знішчана наша Свята-Троіцкая малельня, а паколькі блізка ад названай стараверскай малельні іншых не маецца, то мы вымушаныя на свае ўласныя сродкі збудаваць замест згарэлай новую ў названай вёсцы, бо за яе адсутнасцю ў нас узнікаюць цяжкасці ў адпраўленні духоўных патрэбаў і хросце дзяцей“. Быў створаны праект новай царквы. Але ў яе пабудове было адмоўлена, бо знешне яна нагадвала праваслаўны храм (!): была са званіцай і купалам.
Стараверская царква святой Троіцы ў КублішчынеФота © Dehty | Дата: 1/02/2015
Толькі 14 студзеня 1900 г. прыхажане атрымалі дазвол на пабудову новага храма, але па выпраўленаму праекту, г.зн. каб звонку ён нагадваў выгляд „сялянскай хаты“. Пасля 1905 г. (быў прыняты закон аб свабодзе веравызнання) былі дабудаваныя званіца і купал, і царква набыла той выгляд, які мае зараз.
Стараверская царква ў КублішчынеФота © Друпаў Аляксей
У часе польскага панавання ў абшчыну ўваходзіла 22 вёскі і 21 засценак. У Кублішчыне была двухкласная школа, у якой навучалася 110 дзяцей старавераў. Божы Закон для іх выкладаў старшыня абшчыны Міхаіл Ягоравіч Салаўёў. У 1928 г. у прыходзе налічвалася 2262 прыхажаніны, якія сябе ўсе, без выключэння, лічылі сябе рускімі.
БрамаФота © Dehty | Дата: 1/02/2015
Парафія аб’ядноўвала наступныя вёскі і засценкі: Конахі, Пестуны, Падгайцы, Юнцы, Лаўкі, Селішча, Дворнае Сяло, Марозькі, Крышталі, Смолеўцы, Падзешалеўцы, Мілейкі, Дзяверкі, Забор’е, Струбкі, Мацеўкі, Бабоўшчына, Мінкаўшчына, Глыбка, Мазолева, Промыслі, Чырвонае, Енішкі, Кубелеўшчына, Більдзюгі, Дзяхцяры, Матвееўцы, Кучняры, Грыбаўшчына, Ваўчкі, Канашоўка, Астаноўка, Жалезаўшчына, Мінорына, Чарнічкі, Падапалеўцы і інш.
Аляксандр Адамковіч