> Брэсцкая вобласць > Столінскі раён > вёска Беражное > Сядзіба Алешаў
Беражное. Сядзіба Алешаў
Беражное. Сядзіба Алешаў

Сядзіба Алешаў | Беражное

Не існуе
Год пабудовы (перабудовы): > 1800
Страчаны: > 1939

Фотагалерэі

Выбраныя здымкі

Беражное. Сядзіба Алешаў

Даўняя сядзіба Алешаў у Старым Беражне. Перад вайной належала Anna de Maille, дачцэ Станіслава Радзівіла | Дата: 1936

Беражное. Сядзіба Алешаў

Сядзібны дом, фрагмент
(фота - Roman Aftanazy, Dzieje rezydencji na dawnych kresach Rzeczypospolitej. Tom II) | Дата: 1936

Беражное. Сядзіба Алешаў

Выгляд з боку сада | Дата: 1936

Сядзіба Алешаў Беражное

Старое Беражное належала роду Алешаў. Паводле даследавання Р. Афтаназы, род бярэ пачатак ад валынскага баярына Аляксандра, празванага «Алешам» ці «Алешкам». Ён быў жанаты з Аленай Макасей. Іх сын Фёдар (Тэадор) Алеша Алешкавіч у 1482—1486 гг. служыў сакратаром караля Казіміра Ягелончыка і быў жанаты з князёўнай Ганнай Астражэцкай. У Фёдара і Ганны быў сын Пётр, жанаты з Вольгай Чалганскай. Іх першы сын Пётр Пятровіч Алеша, жанаты з Еўдакіяй Фурса, атрымаў ад князя Фёдара Яраславіча Бароўскага ў 1508 г. маёнтак Беражное на Палессі. У 1524 г. каралева Бона пацвердзіла правы Пятра Алешы на Беражное, Гарадок і Паркані.

На працягу XIX ст. спадчына Алешаў значна ўзрасла. Апошнім 12-м гаспадаром Старога і Новага Беражнога, Церабяжова, Гарадзішча, шэрагу іншых маёнткаў і дамоў у Вільні, Рызе і Пінску быў Цэзарый Антоній Алеша (1820—1892), жанаты з Аляксандрай Орда. Цэзарый Антоній Алеша меў 11 дзяцей: 6 сыноў і 5 дачок. Яшчз пры жыцці падзяліў паміж імі свае маёнткі і землі. Нова-Беражное дасталося Канстанціну. Стара-Беражное атрымаў малодшы сын Цэзарыя Уладзіслаў Алеша. У 1909 г. ён прадаў беражноўскую сядзібу Радзівілам, што гаспадарылі ў суседнім Давыд-Гарадку.

Сядзібны дом Алешаў у Беражным быў драўляным, аднапавярховым, з порцікам на чатырох калонах, на якія абапіраўся трохвугольны шчыт. Сярэдняя частка палаца мела 2 паверхі. Паркавы фасад палаца вылучаны невялікім ганкам на чатырох калонах з тэрасай на 1-м паверсе і балконам на 2-м. З балкона адкрываўся маляўнічы від на раку, за якой размяшчаліся сямейныя могілкі Алешаў. Палац быў накрыты двухсхільным гонтавым дахам. Сцены атынкаваны гладкай тынкоўкай і пафарбаваны ў белы колер.

Палац, яго багатая аздоба і начынне ў большасці знішчаны ў 1-ю сусветную вайну. Да 1939 г., калі ў Стара-Беражным гаспадарыла Ганна Радзівіл, тут існаваў прыгожы англійскі парк. Да палаца праз браму вяла шырокая ўязная алея, абсаджаная ліпамі і таполямі.

Сёння на месцы старога палацава-паркавага ансамбля пабудавана кантора мясцовага калгаса. Ніякіх іншых слядоў існавання сядзібы не засталося.

Паводле: Несцярчук Л. Замкі, палацы, паркі Берасцейшчыны X-XX стагоддзяў. Мн.: БелТА, 2002.