Мінеральная крыніца каля вёскі Палыкавічы — геалягічны помнік прыроды з 1983 г. Вада валодае лекавымі ўласьцівасьцямі, характарызуецца высокім утрыманьнем фтору (к. 0,49 мг/л), наяўнасьцю магнію (5), медзі (0,015), алюміну (0,0002), хрому (0,002), стронцыю (0,001), тытану, ванаду і інш. элемэнтаў. Расход больш як 100 м3/сут.
Дабірацца да крыніцы з Магілёва можна на аўт. 1, трал. 2, да прыпынку вул. Кулібіна (раён заводу Трансмаш), далей – каля паўгадзіны пешшу. Крыніца – магчыма, самы прыгожы куток, даступны магілёўцам. Амаль нязьмененая прырода, глыбокія яры пасярод высокіх узгоркаў і лес. Зараз ідзе аднаўленьне разбуранага ў савецкі час царкоўнага комплексу. Капліца над крыніцаю ўжо адбудаваная.