Žodziški | Catholic church of the Holy Trinity - Comments

2008-01-04 Таня Казак

Былы кальвінскі збор захаваўся ў вёсцы Жодзішкі. Ён быў пабудаваны ў 1612 годзе ўладальнікамі мястэчка, прадстаўнікамі магнацкага роду Кішак, якія былі вядомы сваёй прыхільнасцю да пратэстантызму. Знешне ён падобны да смаргонскага збору. Будынак быў прамавугольным з высокай двух’яруснай вежай-званіцай, лучковымі аконнымі праёмамі без ліштваў. Вырашаны ў простых суровых формах, ён меў на сценах толькі лапаткі, аб’яднаныя прафіляваным карнізам.
Пад уціскам езуітаў кальвіністы пакінулі Жодзішкі. Збор быў пераўтвораны ў прыходскі касцёл Прасвятой Тройцы. Падчас рэканструкцыі, якая праводзіліся ў пачатку ХХ стагоддзя, храм атрымаў форму лацінскага крыжа. Змянілася яго арыентацыя алтаром на захад, да Рыма. Таксама былі прыбудаваны бакавыя капліцы. Галоўны фасад атрымаў завяршэнне ў выглядзе шчыта і руставаны партал пры ўваходзе.
Алтары касцёла, выкананыя паводле праекта Т.Жаброўскага (ХVІІІ ст.), вытрыманы ў стылі ракако. У 1937 годзе інтэр’ер капліцы ў імя святога Пятра і Учынкаў міласэрнасці ўпрыгожыў жывапісам вядомы беларускі мастак Пётра Сергіевіч.
У 1924 годзе пробашчам касцёла Прасвятой Тройцы быў прызначаны Вінцэнт Гадлеўскі — прыхільнік беларусізацыі касцёла, дзеяч беларускага нацыянальнага руху.