Паставы. Касцёл Святога Антонія Падуанскага

Адметныя мясціны і помнікі на абшарах даўняга ВКЛ | Беларусь Літва Падляшша

Міхайлаўская царква ў Чэрску

вёска Чэрск
(Брэсцкі раён, Брэсцкая вобласць)

У цэнтры вёскі Чэрск стаіць помнік архітэктуры барока драўляная Свята-Міхайлаўская царква. Царква пабудавана на мяжы 17—18 ст. (да 1701 г.), адноўлена ў 1860-я гг. Асноўны кубападобны зруб пераходзіць у працяглую 5-гранную апсіду з бакавой рызніцай, раней накрытыя агульным гонтавым дахам з вальмамі па гранях апсіды. Асноўны аб'ём і апсіда былі завершаны фігурнымі барочнымі купаламі. У 19 ст. да галоўнага фасада дабудаваны непрапарцыянальна вялікі квадратны ў плане прытвор. У 1990-я традыцыйныя купалы і каваныя барочныя крыжы былі зменены на маскоўскага стылю цыбуліны, цалкам чужыя мясцовай архітэктуры. У гэты ж час традыцыйнае для палескіх храмаў заверша купалоў было зменена на маскоўскія цыбуліны ў шмат якіх цэрквах. Толькі ў Брэскім раёне пацярпела архітэктура храмаў у Чарнаўчыцах, Шумаках...

Царква ў Чэрску на здымку 1970-х гг.

Царква ў Чэрску на здымку 1970-х гг. У 1990-я гг. барочныя купалы над царквой былі зменены на маскоўскія цыбуліныФота © www.ais.by | Дата фота здымкі: ca. 1975

Чэрск - Царква Святога Міхала Арханёла. Міхайлаўская царква ў Чэрску

Міхайлаўская царква ў ЧэрскуФота © К. Шастоўскі | Дата фота здымкі: 2003/09/21

Малітоўная зала перакрыта корабавым скляпеннем старажытнай канструкцыі. Апсіда вылучана выкананым у 1830-я гг. драўляным разным іканастасам. Адначасова з царквой была пабудавана 3-ярусная званіца арыгінальнай вобразнай трактоўкі. Над ніжнім кубічным зрубам узведзены шырэйшы пірамідальны каркасны ярус-звон, раскрыты 4-пралётнай аркадай; над ім узвышаецца 3-і чацверыковы ярус з шатровым пакрыццём і макаўкай у завяршэнні.

Чэрск - Царква Святога Міхала Арханёла. Званіца

ЗваніцаФота © К. Шастоўскі | Дата фота здымкі: 2003/09/21

На мяжы ХІХ і ХХ стст. прыход чэрскай царквы налічваў 1856 прыхажан у 4 вёсках: Чэрску, Кабелцы, Леплеўцы і Рудні. Паводле даследавання К.Зданьскага, у Міхайлаўскай царкве яшчэ да 2-й сусветнай вайны захоўвалася рукапіснае евангелле XVI ст., напісанае на старабеларускай і старапольскай мовах.

Крыніца:
1. А.М. Кулагін
Праваслаўныя храмы на Беларусі
Мінск, Беларуская Энцыклапедыя, 2001
2. Гродненский православный календарь
Православие в Брестско-Гродненской земле в конце ХІХ века, Том 1
Воронеж, 1899

Беларусь

Літва

Польшча

Расія


Знайдзі свае карані
Пошук сваякоў і продкаў у Беларусі, Літве, Польшчы

Рэклама