Старажытная царква Святога Мікалая ў Берасці
Свята-Мікалаеўская царква ў Берасці існавала ў XIV-XIX стст. Была разабрана пад час пабудовы крэпасці. Вызначалася сярод іншых забудоў горада сваёй старажытнасцю. У гэтай царкве ў 1596 г. была падпісана славутая берасцейская унія.
Мікалаеўская царква ў Берасці. Выява царквы з тытульнага ліста Візітацыі. 1759 г.
Існуюць некалькі выглядаў царквы Св. Мікалая: найбольш вядомы з візітацыйнай кнігі берасцейскіх цэркваў 18 ст., дзе царква ўяўляе сабой чатырохвугольны ў плане будынак з дзвюма вежамі на фасадзе.
Фрагмент гравюры Э. Дальберга «Аблога Берасця шведамі ў 1657 годзе»
Другі выгляд — гэта выразнае адлюстраванне чатырохвежавага будынка на гравюры Эрыка Дальберга, вядомай як «Аблога Берасця шведамі ў 1657 годзе», дзе на плане акольнага горада прысутнічае выява крыжападобнага ў плане будынка.
Месца знаходжання падмуркаў царквы святога Мікалая на тэрыторыі брэсцкай крэпасці
Выдатны помнік дойлідства страчаны ў 1840-50-я гг. пад час пабудовы Брэсцкай крэпасці.