Агароднікі
Агароднікі - вёска, цэнтр Агародніцкага сельсавета Камянецкага раёна, на р. Пульва, за 40 км на захад ад Камянца, 45 км ад Брэста, паблізу ад аўтадарогі Высокае—Пружаны—Слонім. У сярэдзіне 19 ст. вёска ў Брэсцкім павеце Гродзенскай губерні, пры фальварку Александрыя маёнтка Высока-Літоўск, уласнасць памешчыка К. Сапегі. Паводле інвентара маёнтка 1845 г. ў вёсцы налічвалася 8 двароў, 60 наяўных сялянскіх душ. У 2-й палове 19 ст. вёска ва ўласнасці Патоцкіх у Высока-Літоўскай воласці Брэсцкага павета Гродзенскай губерні. Побач з вёскай знаходзіўся фальварак Патоцкіх Александрыя, фрагменты якога захаваліся да нашага часу.
Свіран у былым фальварку АлександрыяФота © Кузіч Мікола | Дата: 13/05/2012
Паводле 10-й рэвізіі (1857 г.) вёска ў складзе Хмялі-Агародніцкай сельскай грамады, налічвалася 49 рэвізскіх душ. У 1897 г. ў Агародніках 16 двароў, 120 жыхароў. У 1905 г. 128 жыхароў. У 1921—39 гг. вёска ў складзе Высока-Літоўскай гміны Брэсцкага павета Палескага ваяводства Польшчы. У 1923 г. ў вёсцы 10 двароў, 52 жыхары. З 12.10.1940 г. вёска — цэнтр сельсавета ў Высокаўскім раёне Брэсцкай вобласці, 16 двароў, 83 жыхары. У Другую сусветную вайну на франтах загінулі і прапалі без вестак 15 жыхароў вёскі. На вясковых могілках пахаваны 73 савецкія воіны, 16 ваеннапалонных, мірныя жыхары, якія загінулі ў вайну. З 17.4.1962 г. Агароднікі ў Камянецкім раёне. У 1960 г. ў вёсцы 57, 1970 г. - 62, 2005 г. - 378 жыхароў.
Літ.:
Гарады і вёскі Беларусі, Энцыклапедыя, Том 4
БРЭСЦКАЯ ВОБЛАСЦЬ, кніга ІI
Мінск, «БЕЛАРУСКАЯ ЭНЦЫКЛАПЕДЫЯ», 2007