Каралін
Вёска Каралін знаходзіцца ў Вярховіцкім сельсавеце Камянецкага раёна, за 30 км на паўночны захад ад Камянца. Да 1939 г. Каралін - фальварак у складзе маёнтка Капылы. У сярэдзіне 19 ст. фальварак Каралін у Брэсцкім павеце Гродзенскай губерні, уласнасць К. Пуслоўскай. Паводле інвентара 1845 г. ў фальварку 648 дзесяцін зямлі, да фальварка адносілася вёска Бярозаўка. У 1890 г. фальварак Ф. Пуслоўскага ў Вярховіцкай воласці Брэсцкага павета, 841 дзесяцін зямлі. Паводле перапісу 1897 г. ў фальварку 1 двор, 42 жыхары. У 1905 г. — 30 жыхароў.
Чворак, частку якога пад сваю сядзібу займаў Віктар Рот – апошні ўладальнік КаралінаФота © Piotr Jaczynowski-Roth | Год: ca. 1930
У 1921-39 гг. фальварак Каралін у складзе Вярховіцкай гміны Брэсцкага павета Палескага ваяводства Польшчы, уласнасць Віктара Рота. З 12.10.1940 г. вёска ў Вярховіцкім сельсавеце Высокаўскага раёна Брэсцкай вобласці БССР, 62 жыхары. Па вайне ў былым маёнтку Каралін быў створаны калгас «Перамога» (60 гаспадарак на 1.1.1949).
Свіран у КаралінеФота © К. Шастоўскі | Дата: 30/04/2006
З 17.4.1962 г. ў Камянецкім раёне. У 1970 г. вёска з’яўлялася цэнтрам калгаса з недарэчнай назвай «Расія». Цяпер цэнтр ЛАТ «Каралін». У 1960 г. — 61, у 1970 г. - 259, у 2005 г. - 301 жыхар. З колішніх шматлікіх фальварковых пабудоў у добрым стане захаваўся 3-павярховы свіран з буту.
Літ.:
Гарады і вёскі Беларусі, Энцыклапедыя, Том 4
БРЭСЦКАЯ ВОБЛАСЦЬ, кніга ІI
Мінск, «БЕЛАРУСКАЯ ЭНЦЫКЛАПЕДЫЯ», 2007