Маставуха - фота і помнікі

Гісторыя Маставухі

Маставуха – невялікая вёска па-над ракой Бярэзінай побач з шашой Докшыцы – Ушачы. Назва яе, безумоўна, паходзіць, ад моста праз Бярэзіну, які існуе ў гэтым месцы з 19 стагоддзя. Афіцыйна Маставуха носіць назоў “Чарнічка-2”. Тым не менш на шашы стаіць знак “Маставуха” і ў раскладзе руху аўтобусаў у Докшыцах напісана гэтак жа.

Усяго ў гэтым краі існуюць чатыры паселішчы з назовам Чарнічка, два – з назовам Чарніца і рака Чарніца (назва, зрэшты, узьнікла не выпадкова – чарніц тут сапраўды шмат). Па зьвестках за 1930 год, у засьценку Чарнічка-2 пражывалі 35 чалавек, якім належалі 40 дзесяцін зямлі. Зрэшты, на мапе 1932 года пазначаны як два розныя паселішчы Чарнічка-2 (13 двароў) і Маставуха (1 двор). У 2004 годзе ў вёсцы Маставуха (Чарнічка-2) 8 двароў, пражывае 14 чалавек. Як памяць аб даўніх часах захаваліся тут старадаўнія курганы - “валатоўкі”, якія не значацца ў афіцыйным сьпісе археалагічных помнікаў.

Кастусь Шыталь, краязнаўца
e-mail: ksz@tut.by