Дзмітравічы
Вёска Дзмітравічы - цэнтр Дзмітравіцкага сельсавета Камянецкага раёна, за 12 км на поўнач ад Камянца. Паводле пісьмовых крыніц вядома з 2-й паловы XVI ст. ў складзе Берасцейскага павета Берасцейскага ваяводства ВКЛ, дзяржаўная ўласнасць. У 1786 г. пабудавана драўляная ўніяцкая царква. У 1-й палове 19 ст. сяло ў Брэсцкім павеце Гродзенскай губерні Расійскай імперыі . Адносілася да фальварка Ямна маёнтка Дамброва. Паводле інвентара маёнтка за 1847 г. уладанне памешчыкаў Сівераў і Бахмеццевай, у сяле Дзмітравічы 311 наяўных сялянскіх душ. З 1860-х гадоў - цэнтр Дзмітравіцкай воласці Брэсцкага павета. У 1885 г. сяло, 42 двары, 399 жыхароў, валасное праўленне, Спаса-Праабражэнская царква, школа, за 1 вярсту ў сядзібе Ямна вінакурня. Паводле перапісу 1897 г. ў Дзмітравічах 74 двары, 498 жыхароў, народнае вучылішча, хлебазапасны магазін, карчма. У 1905 г. - 560 жыхароў, у народным вучылішчы 97 навучэнцаў.
Праабражэнская царква ў ДзмітравічахФота © Кузіч Мікола | Дата: 22/04/2012
У 1921-39 гг. Дзмітравічы - цэнтр Дзмітравіцкай гміны Брэсцкага павета Палескага ваяводства Польшчы. У 1923 г. - 89 двароў, 402 жыхары (400 праваслаўных, 2 каталіка). З 12.10.1940 г. вёска - цэнтр Дзмітравіцкага сельсавета Камянецкага раёна Брэсцкай вобласці БССР. У 1940 г. - 121 двор, 614 жыхароў, 7-гадовая школа, бетонны завод, маслазавод, пошта. У Другую сусветную вайну на франтах загінулі і прапалі без вестак 25 жыхароў вёскі. Пасля вайны вёска Дзмітравічы ў розны час уваходзіла ў склад калгасу «Пагранічнік», калгасу і саўгасу імя Дзімітрава, саўгасу «Белавежскі». Паводле перапісаў у вёсцы ў 1960 г. - 372, у 1970 г. - 616, у 2005 г. - 609 жыхароў. У Дзмітравічах захаваўся помнік драўлянага дойлідства XVIII ст. - Праабражэнская царква.
Літ.:
Гарады і вёскі Беларусі, Энцыклапедыя, Том 4
БРЭСЦКАЯ ВОБЛАСЦЬ, кніга ІI
Мінск, «БЕЛАРУСКАЯ ЭНЦЫКЛАПЕДЫЯ», 2007