Агароднікі - фота і помнікі

Гісторыя Агароднік

Вёска Агароднікі ўзнікла пасля правядзення ў Кобрынскай эканоміі аграрнай рэформы 1557 г. У рэвізіі 1563 г. памінаюцца 10 сем'яў агароднікаў, што былі выселены з Вяжэцкага двара і паклалі пачатак новаму паселішчу. Вёска належала да вялікакняжацкіх «сталовых» земляў.

Агароднікі апісваюць інвентары 1712, 1724, 1731, 1742, 1783 і 1786 гг. У XIX ст. належала маёнтку Вежкі Даманскіх. З 1866 г. вёска стала цэнтрам Мураўёўскай воласці Пружанскага павета, налічвала 106 жыхароў. Меліся царква (з XVII ст., пад назваю «Вяжэцкая»), народнае вучылішча (з 1863 г.). Ад 1870-х гг. на Узнясенне і 14 кастрычніка праводзіліся кірмашы.

У 1912 г. пабудавана новая царква, якая капітальна адрамантавана ў 1925 г. У 1935 г. насельніцтва складалася са 184 жыхароў, у 1970 г. павялічылася да 213, цяпер складае 104 (1998 г.). У 1990-1997 гг. была адноўлена царква; асвечана 7.11.1997 г. мітрапалітам Філарэтам.

Літ.:
А. Р. Бензярук
Памяць. Жабінкаўскі раён
Мінск, Ураджай, 1999

Апублікавана з ласкавай згоды аўтара Анатоля Бензярука