Астроўкі - фота і помнікі

Гісторыя Астровак

Маёнтак Астроўкі ўпамінаецца ў 1530 г. пры разглядзе справы па ўдакладненню межаў уладанняў С. Ільініча (маёнтак Мір) і баяраў Бейнаровічаў, Пратасовічаў, Чыжоў. У 1861 г. Астроўкі — сяло ў Навагрудскім павеце, 30 двароў, 269 жыхароў, малацілыія, Георгіеўская царква. У 1870 г. сяло Гарадзейскай воласці таго ж павета, 166 душ мужчынскага полу. У 1885 г. — 41 двор, 330 жыхароў, царква, капліца. Побач знаходзіліся 2 фальваркі той жа назвы — уладанне Грыневічаў (10 валок 5 маргоў) і Булгака (376 дзесяцін зямлі). У 1888 г. каля в. Астроўкі меліся 3 прыватныя ўладанні: І.С. Булгака (маёнтак Астроўкі), Я.П. Буцько (участак Астроўкі, 8 дзесяцін зямлі) і І.Ф. Гардзеевіча (участак Астроўкі, 12 дзесяцін зямлі). У 1897 г. на месцы сучаснай вёскі знаходзіліся: сяло — 74 двары, 456 жыхароў, 2 хлебазапасныя магазіны; 2 маёнткі — 2 двары, 21 жыхар, ветраны млын і 9 двароў, 22 жыхары; фальварак Пратасевіча, 4 двары, 7 жыхароў. Побач з будынкамі сяла знаходзіліся сядзібы псаломшчыка (2 жыхары) і святара (6 жыхароў).

У 1889 г. ў сяле адкрыта аднакласная царкоўна-прыходская школа, ў якой у 1890/91 навучальным годзе вучыліся 46 хлопчыкаў і 17 дзяўчынак. У 1909 г. ў вёсцы 79 двароў, 482 жыхары, маёнтку памешчыка Булгака — 35 жыхароў, маёнтку памешчыка Грыневіча — 19 жыхароў. З сакавіка 1918 г. Астроўкі уваходзяць у склад абвешчанай БНР. У 1921—39 гг. — у складзе Польшчы, у Гарадзейскай гміне Нясвіжскага павета. У 1921 г. вёска, 94 двары, 491 жыхар і 3 фальваркі (Астроўкі-1,2,3 ) — адпаведна 18, 4, 18 жыхароў. З 1939 г. ў БССР, з 4.12.1939 г. ў Нясвіжскім павеце, з 15.1.1940 г. ў Нясвіжскім раёне Баранавіцкай вобласці, з 12.10.1940 г. — цэнтр сельсавета таго ж раёна і вобласці, з 8.1.1954 г. ў Мінскай вобласці. У 1940 г. ў вёсцы 111 двароў, 575 жыхароў, магазін, пачатковая школа, фельчарска-акушэрскі пункт. У былым маёнтку — 2 двары, 48 жыхароў. У сакавіку 1949 г. ў вёсцы створаны калгас імя Кірава. З 1952 г. вёска — цэнтр узбуйненага калгаса імя Маленкова (у жніўні 1957 перайменаваны ў калгас імя Дзяржынскага, з 30.12.1996 рэарганізаваны ў калектыўнае сельскагаспадарчае прадпрыемства імя Дзяржынскага).

На 1.1.2001 г. 179 двароў, 463 жыхары. Дом культуры, бібліятэка, 3 магазіны, сталовая, аддзяленне сувязі, філіял ААБ «Беларусбанк», гараж, жывёлагадоўчая ферма. На паўднёвай ускраіне вёскі магілы партызан В.К.Камаева і С.Ф.Гарэцкага, якія загінулі ў 2-ю сусветную вайну. У 1967 г. на магіле пастаўлены абеліск. Захавалася драўляная царква Раства Багародзіцы (помнік архітэктуры 18-19 ст. ).

Крыніца:
В.М. Князева
Памяць. Нясвіжскі раён
Мінск, Белта, 2002