Беняконі - фота і помнікі

Гісторыя Беняконяў

Беняконі - былое мястэчка. Сёння цэнтр сельсавета ў Воранаўскім раёне. Чыгуначная станцыя на лініі Ліда—Вільня. За 12 км на Пн ад Воранава, на шашы Ліда—Вільня. 545 двароў, 1512 жыхароў (1991 г.). У 1-й палове 17 ст. Беняконі належалі Яну Чаплінскаму, які ў 1634 заснаваў тут драўляны касцёл Яна Хрысціцеля. З 1795 г. у складзе Расейскай імперыі. У 1880-я гады ў Беняконях дзейнічаў млын, была пачатковая школа. У 19 — пач. 20 ст. мястэчка, цэнтр воласці Лідскага павета Віленскай губерні. У 1910 г. непадалёку ад Беняконяў створана доследная сельска-гаспадарчая станцыя (дзейнічала да 1959 г.). У 1-ю сусветную вайну Беняконі акупаваны германскімі войскамі. З сакавіка 1918 г. ў складзе абвешчанай БНР. У 1920-22 гг. у Сярэдняй Літве, 1922-39 гг. - у складзе Польшчы. З 1939г. — у БССР. З 12.10.1940 г. цэнтр сельсавета Воранаўскага раёна. У 2-ю сусветную вайну акупаваны ням.-фаш. войскамі, вызвалены ў ліпені 1944 г. У 1970 г. 502 двары, 1726 жыхароў.

Захаваўся помнік архітэктуры пач. 20 ст. касцёл Яна Хрысціцеля. На могілках пахавана Марыя Путкамер (з Верашчакаў; каля 1799—1863) — каханая Адама Міцкевіча, сяброўка Я. Чачота і іншых філаматаў.

Крыніца:
В.У. Шаблюк
Энцыклапедыя гісторыі Беларусі. Т.2.
Мінск, "Беларуская Энцыклапедыя", 1995