Грудопаль - фота і помнікі

Грудопаль

Рэшткі парку Грудопаль размешчаны на ўсходняй мяжы Івацэвіцкага раёна побач з шашой Івацэвічы-Слуцк. Разам з Рэгінавам, Рудняй, Івацэвічамі і іншымі маёнткамі, размешчанымі па-над р. Шчарай, Грудопаль з XVI ст. належаў роду Юндзілаў. Пасля паўстання 1863 г. усе маёнткі ў Юндзілаў былі канфіскаваны і перададзены расейцам Варанцовым, а пасля царскай амністыі зноў вернуты Юндзілам.

У канцы XVIII ст. у Грудопалі быў пабудаваны драўляны аднапавярховы, прамавугольны ў плане жылы дом, накрыты гладкім гонтавым дахам. Цэнтральны фасад быў вылучаны ганкам. Побач месціліся афіцына, а па-за межамі парку размяшчаўся шэраг гаспадарчых пабудоў, у т.л. бровар. Быў закладзены вялікі пейзажны парк, пабудавана фамільная капліца-пахавальня Юндзілаў. Сядзібны дом меў набор традыцыйных памяшканняў: залу, сталовую, салон, спальні, бібліятэку, рабочыя кабінеты і г.д. У 1914—1920 гг. палац быў моцна абрабаваны.

Пасля 2-й сусветнай вайны сядзіба ў Грудопалі выкарыстоўвалася ў якасці бальніцы. Час і розныя абставіны моцна змянілі першапачатковае аблічча сядзібна-паркавага ансамбля. Цяпер ад колішняга ансамбля засталіся парк плошчай каля 10 га, 2 уязныя алеі, сістэма абмялелых равоў, падмуркі сядзібнага дома і капліцы, разбураных у 1970-я гады.

Паводле:
Л. М. Несцярчук,
"Замкі, палацы, паркі Берасцейшчыны X—XX стагоддзяў"
Мінск, БЕЛТА, 2002