Сейлавічы - фота і помнікі

Гісторыя Сейлавічаў

У 1586 г. князь Мікалай Радзівіл аддаў Нясвіжскай плябаніі 8 валок зямлі, што знаходзіліся паміж «валок Сейлаўскіх». У 1722 г. Сейлавічы, засценак Нясвіжскай ардынацыі, які Ганна Радзівіл аддала шляхце на леннае ўладанне. У 1793 г. вёска і засценак Сейлавічы фальварка Ганусаўшчызна, з 1796 г. ў Слуцкім павеце, уладанне Радзівілаў. Вёска налічвала 53 дымы, 285 жыхароў, карчма.

У 1811 г. ў вёсцы 62 гаспадаркі, 167 душ мужчынскага полу; у 1845 г. ў аднаіменным засценку — 69 двароў, 332 жыхары. У 1852 г. вёска, 51 дым, 287 жыхароў і засценак, 62 дымы, 28 валок зямлі. У 1876 г. ў засценку 1110 дзесяцін зямлі, уладанне Радзівілаў. У 1897 г. вёска, 89 двароў, 511 жыхароў, хлебазапасны магазін, 2 ветраныя млыны і засценак, 96 двароў, 513 жыхароў, царква; у Гавязнянскай воласці.

У 1909 г. ў вёсцы 568 жыхароў, засценку 635 жыхароў. З сакавіка 1918 уваходзіць у склад абвешчанай БНР. У 1921—39 гг. у складзе Польшчы, у Гавязнянскай гміне Нясвіжскага павета (у 1921 г. 109 двароў, 592 жыхары; засценак, 107 двароў, 576 жыхароў). З 1939 г. ў БССР, з 4.12.1939 г. ў Нясвіжскім павеце, з 15.1.1940 г. ў Нясвіжскім раёне Баранавіцкай вобласці, з 12.10.1940 г. цэнтр ссльсавета таго ж раёна і вобласці, з 8.1.1954 г. Мінскай вобласці. У 1940 г. 159 двароў, 820 жыхароў, 1 маторны і 4 ветраныя млыны (прыватныя), няпоўная сярэдняя школа, хата-чытальня, бальніца. У засценку 109 двароў, 507 жыхароў. У верасні 1948 г. ў засценку створаны калгас імя Дзяржынскага (старшыня С.В. Петрашэўскі), у верасні 1949 г. ў вёсцы калгас «Перамога». З 1951 г. вёска — цэнтр узбуйненага калгаса імя Андрэева, 13.12.1961 г. калгас атрымаў назву «Світанне». На 1.1.2001 г. 297 двароў, 698 жыхароў, вёска — цэнтр Сейлавіцкага сельсавета і калгаса. Клуб, бібліятэка, сярэдняя школа, дзіцячы сад, урачэбная амбулаторыя, 3 магазіны, сталовая, аддзяленне сувязі, філіял ААБ «Беларусбанк», аптэка, аўтаматычная тэлефонная станцыя, 2 жывёлагадоўчыя фермы. Дзейнічае касцёл (верагодна, пабудаваны ў 18 ст. як уніяцкая царква).

Крыніца:
В.М. Князева
Памяць. Нясвіжскі раён
Мінск, Белта, 2002