Вёска Шэбрын
Вёска Шэбрын знаходзіцца ў Тэльмінскім сельсавеце, за 15 км на ўсход ад Брэста, на правым беразе р. Мухавец. Паводле пісьмовых крыніц вёска вядома з 16 ст. як шляхецкая ўласнасць у Берасцейскім старостве і павеце ВКЛ. У той час тут ужо існавала царква Раства Багародзіцы, якой біскуп луцкі і берасцейскі Ю. Фалькоўскі адпісаў у 1518 г. 6 валок зямлі. Пасля 3-га падзелу Рэчы Паспалітай у 1795 г. Шэбрын у складзе Расійскай імперыі, спачатку ў Слонімскай, з 1797 года — у Літоўскай, а з 1801 года — у Гродзенскай губерні. У 1793-1798 гг. епіскапам Канстанцінам у Шэбрыне пабудавана прыхадская мураваная царква.
Царква Нараджэння Божай Маці ў ШэбрынеФота © К. Шастоўскі | Дата фота здымкі: 2002/06/22
У 1849 г. дзейнічаў паром цераз Мухавец. У 1886 г. сяло ў Косіцкай воласці Брэсцкага павета, 17 двароў, 285 жыхароў; праваслаўная царква, царкоўна-прыходская школа, карчма. У 1889 г. працавала народнае вучылішча (57 хлопчыкаў і 11 дзяўчынак). З 1890 г. — цэнтр Кобрынскага сялянскага таварыства (484 дзесяцін зямлі). Побач з вёскай знаходзіўся фальварак Шэбрын, які належыў У. Дмітроўскаму. Паводле перапісу 1897 г. ў вёсцы 54 двары, 429 жыхароў, царква, народнае вучылішча, хлебазапасны магазін, карчма. У 1900 г. заснаваны торфараспрацоўчы завод, на якім працавалі 20 рабочых; уведзены паравы рухавік. У 1905 г. сяло (541 жыхар) і маёнтак (62 жыхары) у Косіцкай воласці Брэсцкага павета Гродзенскай губерні.
Паводле Рыжскай мірнай дамовы 1921 г. ў складзе Польшчы, у Косіцкай гміне Брэсцкага павета Палескага ваяводства; у вёсцы было 47 двароў, 280 жыхароў. На месцы былога фальварка размяшчалася вайсковая асада Ямно-Шэбрын. З верасня 1939 г. ў складзе БССР. У 1940 г. 90 двароў, 290 жыхароў. Паводле перапісаў 1959 г. — 306, 1970 г. — 243 жыхары. У 1997 г. 54 гаспадаркі, 88 жыхароў. 52 гаспадаркі, 83 жыхары (2005). У складзе саўгаса «Брэсцкі» (цэнтр — в. Тэльмы І); аддзяленне і малочнатаварная ферма саўгаса, клуб, магазін, аздараўленчы лагер «Церамок». На поўнач ад вёскі знаходзіцца Брэсцкі аэрапорт. У вёсцы захаваўся помнік архітэктуры — Прачысценская царква (1793).
Крыніца:
Гарады і вёскі Беларусі, Энцыклапедыя, Том З
БРЭСЦКАЯ ВОБЛАСЦЬ, кніга І
Мінск, «БЕЛАРУСКАЯ ЭНЦЫКЛАПЕДЫЯ», 2006