Воўкавічы - фота і помнікі

Гісторыя Воўчкавічаў

У 1557 г. Воўчкавічы (Вовчковичи) — сяло, шляхецкая ўласнасць. У 1582 г. сяло Воўкавічы (Волкoвичи), шляхецкая ўласнасць Д.Л. Воўкавай, Н. Маркоўнай. У 1600 г. Воўкавічы — сяло, уласнасць Ф.В. Воўка-Пчыцкага. У 1667 г. Воўчкевічы (Волчкевичи) — вёска маёнтка Гарадзішча, 8 дамоў. У 1791 г. Воўчкевічы — вёска, цэнтр маёнтка (6 вёсак) Каралішчавіцкай парафіі, шляхецкая ўласнасць Іваноўскіх, двор, 52 дымы, карчма, каталіцкая капліца (разабрана ў 1806 г.). У 1800 г. — панскі двор i вёска, уласнасць старасціны Марцыяны Іваноўскай. Двор i вёска размяшчаліся на левым беразе р. Пціч; 15 двароў, 129 жыхароў, новая драўляная капліца Раства Найсв. Панны Марыі (пабудавана ў 1810 г. па фундацыі Марцыяны Іваноўскай), ветраны млын. Пры двары на р. Пціч млын на два паставы. У 1815 г. — вёска, уласнасць М. Іваноўскай. У 1897 г. Воўчкавічы (Boлчковичи) — вёска Самахвалавіцкай воласці, 42 двары, 272 жыхары; y маёнтку 7 двароў 51 жыхар, кузня, млын, карчма; ва ўрочышчы двор, 7 жыхароў. У 1904 г. на высокім берагавым пагорку р. Пціч пабудаваны вялікі мураваны касцёл Сэрца Езуса і Найсв. Панны Марыі. У 1917 г. ў вёсцы 60 двароў, 323 жыхары; y фальварку двор, 77 жыхароў. У 1941 г. 56. двароў, 313 жыхароў. Паўразбураны ў другую сусветную вайну касцёл узарваны ў 1950-я г.

На 1.1.1997 г. Воўчкавічы — вёска Шчомысліцкага сельсавета, 108 гаспадарак, 311 жыхароў. Гандлёвы цэнтр, клуб, цэнтр водных відаў спорта. На падмурках былога маёнтка (процілеглы бераг р. Пціч) у савецкі час пабудавана спартовая база па веславаннню.

Крыніца:
Памяць. Мінскі раён
Мінск, Беларуская Энцыклапедыя, 1998