Дом на рынку | Нясвіж

Больш фотаздымкаў (4) >>

Так званы “Гданьскі дом” (ці “Дом на рынку”, "Жылы дом рамесніка") пабудаваны ў 1721 г. Мураваныя жылыя дамы пачатку 18 ст. ў краіне амаль не захаваліся, таму «Дом на рынку» ў Нясвіжы — каштоўны помнік архітэктуры барока.

Двухпавярховы, першы паверх мураваны, другі з драўляных канструкцый. Першапачаткова ўваходзіў у ансамбль забудовы рыначнай плошчы. Да вуліцы Чапаева (раней гандлёвай плошчы) жылы дом павернуты мураваным фасадам з фігурным барочным шчытом, які закрывае больш вузкі паверх з двухсхільным дахам. Аконныя праёмы на галоўным фасадзе размешчаны сіметрычна цэнтральнай восі, падкрэсленай уваходам і балконам з ажурнай агароджай на другім паверсе над уваходам. Фігурны шчыт на галоўным фасадзе вылучаны тонкім прафіляваным карнізам. Невялікі праём у цэнтры шчыта і 2 маленькія нішы па баках аздоблены ляпнінай і дэкаратыўнымі ліштвамі. Уваход на другі паверх з боку дваровага фасада. На 1-м паверсе размяшчаліся складскія памяшканні і крамы, на другім — жылыя пакоі. Будынак рэканструяваны пад бібліятэку.

Крыніца:
Т.І. Чарняўская
Памяць. Нясвіжскі раён
Мінск, Белта, 2002