Прысядзібны парк пры былой сядзібе Жулкоўскіх | Жулкаўшчына

Колішняя сядзіба роду Касцюшкаў, пазней Жулкоўскіх. Размяшчалася пры дарозе паміж Малымі і Вялікімі Сяхновічамі насупраць праваслаўных могілак. У 1763 г. маёнтак у якасці пасагу адышоў за Кацярынай Касцюшкай да яе мужа К. Жулкоўскага. Ад яго прозвішча і атрымаў назву. У 1782 г. К. Жулкоўскі быў адным з крэдытораў і фундатараў Тадэвуша Касцюшкі. З цягам часу Жулкаўшчына далучалася зноў да Малых Сяхновіч. На сённяшні дзень засталіся рэшткі пейзажнага парку, плошча якога складае цяпер каля 4 га. Захаваліся 2 сажалкі, якія злучаны паміж сабою равамі. Сажалкі і равы абмялелі і зараслі. У парку растуць ліпы, таполі, ясені, клёны, дэкаратыўныя кусты.

У цэнтры парку стаяў аднапавярховы драўляны палац. Архітэктурнае аблічча яго невядомае. Паводле меркавання мясцовага краязнаўца А. Бензярука, палац, верагодна, быў знішчаны ў час 1-й сусветнай вайны.

Насупраць сядзібы цераз дарогу на Сяхновіцкіх могілках засталіся рэшткі паўразбуранай капліцы-пахавальні. Капліца пабудавана з чырвонай цэглы са стральчатымі вокнамі, у плане мае форму шасцівугольніка. Рэшткі парку і капліцы-пахавальні патрабуюць узяцця на ўлік і пад ахову дзяржавы.

Крыніца:
Л.М. Несцярчук
Замкі, палацы, паркі Берасцейшчыны Х-ХХ стагоддзяў
Мінск, "БЕЛТА", 2002