Кляштар езуітаў | Юравічы

Больш фотаздымкаў (84) >>

Помнік архітэктуры позняга барока. Пабудаваны ў 1726-46 у цэнтры в. Юравічы, на беразе р. Прыпяць на месцы драўлянага кляштара, узведзенага ў 2-й палове 17 ст. З 1778 тут дзейнічаў езуіцкі калегіум. У 1820 ён перададзены бернардзінскаму ордэну. Закрыты пасля паўстання 1863-64 гг.

Комплекс уключае касцёл і корпус калегіума, аб’яднаныя ў адзіную аб’ёмна-прасторавую кампазіцыю. Размешчаны на высокім узгорку, за высокай мураванай агароджай з уязной брамай (захаваліся паўднёвая і заходняя сцены), абкружаны пладовым садам. Па вуглах агароджы і абапал брамы круглыя ў плане вежы з байніцамі.

Касцёл – 3-нефавая мураваная базіліка з выцягнутай паўкруглай алтарнай апсідай і 2-вежавым галоўным фасадам, які падзелены на 3 ярусы развітымі антаблементамі, расчлянены вязкамі пілястраў, крапаваны франтонамі. Разнастайныя нішы і вокны аздоблены складанымі профілямі і лепкай. Бакавыя сцены расчлянёны спаранымі лапаткамі і неглыбокімі нішамі. Абапал алтара – 2-павярховыя сакрысціі. Да паўночнай сакрысціі прылягае 2-светлавы калідор, які вядзе ў будынак калегіума. Пад касцёлам размешчана крыпта.

Корпус калегіума – 2-павярховы П-падобны ў плане будынак. Яго сіметрычная аб’ёмна-прасторавая кампазіцыя падкрэслена 2 трох’яруснымі вежамі на вуглах дваровага фасада. Сцены рытмічна расчлянёны пілястрамі, аконныя праёмы маюць фігурныя абрамленні. Планіроўка галерэйная з вялікай залай у цэнтры. Перакрыцці абодвух паверхаў скляпеністыя. Касцёл збярогся часткова, не дзейнічае. Комплекс – помнік рэспубліканскага значэння. (Звесткі на 1993 год).

Цяпер тут дзейнічае праваслаўны манастыр Раства Багародзіцы.

Крыніца:
Архітэктура Беларусі: Энцыкл. давед. / Беларус. Энцыкл.; Рэдкал.: А.А. Воінаў і інш. – Мінск: БелЭн, 1993. - С. 494