Касцёл Святога Юр'я | Варона

Больш фотаздымкаў (13) >>

Касьцёл знаходзіцца на паўночнай ускраіне вёскі, на старых могілках. Узнікненне невялікага мураванага храма даследчыкі адносяць да 17 ст. З'яўляўся філіяльнай капліцай пры касцёле ў в. Гервяты. Адкрыты ў 1990 г.

Помнік архітэктуры барока. Цэласнасць прамавугольнага ў плане цаглянага будынка пад высокім 2-схільным дахам парушыла нетрадыцыйная дабудова да тыльнага фасада нізкай квадратнай сакрысціі (канец 19 — пачатак 20 ст.). Плоскасны галоўны фасад не атрымаў выразнай архітэктурна-стылёвай характарыстыкі: сцяна таўшчынёй 1 м прарэзана нізкім лучковым праёмам увахода, завершана 2-ярусным атыкам і фігурным франтонам з вежачкай. Бакавыя таксама мятровыя сцены знадворку і ўнутры ўмацаваны слаёнымі лапаткамі, прарэзаны арачнымі аконнымі праёмамі.

У інтэр'еры фрэскавая размалёўка: на бакавых сценах выявы апосталаў, на алтарнай з нішай — выява перспектыўнага алтара з каланадай іанічнага ордэра, антаблементам і конхай, на столі — імітацыя купала. Драўляная агароджа хораў размалявана кесонамі з разеткамі.

Крыніца:
А.М. Кулагін
Каталіцкія храмы на Беларусі
Мінск, Беларуская Энцыклапедыя, 2000