Касцёл Святой Ганны | Варонча

Больш фотаздымкаў (24) >>

Касцёл св. Ганны ў Варончы — помнік архітэктуры класіцызму. Пабудаваны ў 1809 г. (паводле іншых звестак — у 1773, 1781 г.) апошнім навагрудскім ваяводам Юзафам Несялоўскім (пахаваны ў крыпце касцёла ў 1816 г., пазней труна перанесена ў капліцу ў Сэрвач). Верагодна, будаўніцтва касцёла звязана з існаваннем тут езуіцкай місіі ў 1749—1773 гг. (калонія наваградская) і першыя даты звязаны з пабудовай папярэдняга касцёла. Асвячоны віленскім біскупам Ігнаціем Масальскім у прысутнасці 2 вікарыяў; налічваў на 1912 г. каля 3 тыс. парафіян. Пры касцёле была 2-павярховая мураваная плябанія. У касцёле быў хрышчоны Ян Чачот. Побач з касцёлам пахаваны дзяды і бацькі славутага фатографа Яна Булгака (магілы захаваліся).

У сілуэце мураванага храма дамінуюць дзве 3-ярусныя купальныя вежы з паўцыркульнымі праёмамі і 3-вугольным франтонам па цэнтры. Галоўны фасад вылучаны прысценным дарычным 6-калонным порцікам з антаблементам, аздоблены рустам, прарэзаны паўцыркульнымі аконнымі праёмамі, бакавыя фасады — стральчатымі, бакавыя паўкруглыя каплічкі — лучковымі і круглымі вокнамі. У інтэр'еры часткова зберагліся цыліндрычныя скляпенні з распалубкамі, што перакрываюць 3 нефы, у алтарнай частцы — насценная размалёўка ў выглядзе архітэктурных куліс.

Крыніца:
А.М. Кулагін
Памяць. Карэліцкі раён
Мінск, Ураджай, 2000