Капліца святых Іахіма і Ганны ў Агародніках
На паўночнай ускраіне вёскі Агароднікі на вясковых могілках стаіць мураваная каталіцкая капліца Святых Іахіма і Ганны, помнік архітэктуры неакласіцызму. Фундаваны ў 1763 г. Салагубамі ў сваім маёнтку Вашкевічы як філіяльны касцёл парафіі Ельня. Анатоль Кулеш сцвярджае, што касцёл пабудаваны па праекце італьянскага архітэктара Петрунэлі, якога запрасіў у 1763 годзе мецэнат будоўлі. У канцы 1990-х гг. касцёл быў адноўлены па праектных дакументах Петрунэлі, якія захоўваюцца ў Гродзенскім абласным архіве (Лідская газета. № 125(12385) - 2013).
Капліца Святых Іахіма і Ганны ў колішнім фальварку Вашкевічы (цяпер вёска Агароднікі)Фота © К. Шастоўскі | Дата фота здымкі: 2014/07/09
Шкада, што А. Кулеш не падаў крыніцу гэтай інфармацыі, і, яна патрабуе далейшага ўдакладнення. Бо неакласіцыстычны стыль, у якім быў пабудаваны касцёл у Вашкевічах, на Літву прыйшоў толькі ў 1780-я гг. Абдудова катэдры Святога Станіслава ў Вільні - першага вядомага аб'екта ў гэтым новым стылі ў нашых краях - пачалася толькі ў 1777 г. і працягвалася да 1820 г. А будынак віленскай ратушы будаваўся ў 1785-1799 гг.
Капліца ў Вашкевічах на здымку да 1939 г.Фота © Буяк Андрэй | Дата фота здымкі: < 1939
Некалькі разоў касцёл у Вашкевічах цярпеў ад пажару. У XIX ст. адбудоўваўся Ленскімі (верагодна, у гэты час ён і атрымаў цяперашні выгляд). Пасля апошняга пажару, у 1975 годзе, знаходзіўся ў паўзруйнаваным стане. Рэстаўрацыйныя работы пачаліся ў сярэдзіне 1990-х гг. і былі закончаны да 26 чэрвеня 2000 года, да дня святых Іахіма і Ганны, імя якіх носіць капліца. Нажаль, падчас гэтых прац не быў адноўлены антаблемент, і галоўны фасад страціў адзін з характэрнейшых элементаў стылю (параўнуйце з міжваенным здымкам).
Рэшткі капліцы на здымку да 1995 г.Фота © Буяк Андрэй | Дата фота здымкі: < 1995
Погляд на капліцу ад захадуФота © К. Шастоўскі | Дата фота здымкі: 2014/07/09
Капліца вырашана прамавугольным у плане аб'ёмам пад аднасхільным дахам. На галоўным фасадзе вылучаны 6-калонны порцік з трохвугольным франтонам, над якім надбудавана 2-ярусная 4-гранная вежачка з крыжом. З тыльнага боку далучана прамавуголная апсіда. Бакавыя фасады расчлянёны высока ўзнятымі прамавугольнымі аконнымі праёмамі і пілястрамі ў прасценках.