Касцёл Святога Юр'я ў Паланэчцы
У цэнтры вёскі Паланэчка, непадалёк ад палаца Радзівілаў, стаіць прыгожы драўляны Юр'еўскі касцёл, узведзены ў 1899 г. Папярэдні касцёл быў пабудаваны ў 1751 г. таксама з дрэва па фундацыі біскупа Жалкоўскага. У гэтым касцёле хрысцілі Iгната Дамейку. Новы храм пабудаваны паводле праекта 1895 г. варшаўскага архітэктара К.Вайцяхоўскага.
Касцёл Святога Юр'я ў ПаланэчцыФота © Шамкаловіч Ю. | Дата: 10/2000
Касцёл атрымаў рысы неаготыкі і мадэрна. Прамавугольны ў плане асноўны аб'ём з 5-граннай апсідай, да якой сіметрычна далучаны 2 нізкія сакрысціі, накрыты 2-схільным дахам з прагінам і завершаны над апсідай меньшым 2-схільным дашкам з крыжам. Апсіда мае гранёнае вальмавае пакрыццё. Галоўны заходні фасад фланкіраваны 2 чацверыковымі шатровымі вежамі, паміж якімі франтон з акном-ружай. Уваход аформлены 2-слуповым ганкам пад 2-схільным навесам.
Галоўны фасад. ФрагментФота © К. Шастоўскі | Дата: 25/01/2004
Гарызантальна ашаляваныя бакавыя фасады рытмічна расчлянёны высокімі стральчатымі аконнымі праёмамі і ступеньчатымі контрфорсамі ў прасценках. У дэкоры выкарыстаны накладны геаметрычны арнамент, які апяразвае карніз на дэнтыкулах, фігурная шалёўка, гатычныя пераплёты вокнаў.
Фрагмент інтэр'еру. АмбонФота © К. Шастоўскі | Дата: 25/01/2004
Унутры зала перакрыта бэлечнай столлю. Пры ўваходзе на 6 слупах хоры з арганам, выкананым віленскім майстрам Ф. Астрамецкім у 1897 г. 2-ярусны драўляны алтар фланкіраваны карынфскімі калонамі. Яго бакавыя абразы і прафіляваны цокаль дэкарыраваны пышным віццём аканту. У алтары 2 чыгунныя мемарыяльныя дошкі 1829 г. і 1836 г., прысвечаныя роду Радзівілаў.
Мэмарыяльная табліца ў памяць аб жонцы аднаго з Радзівілаў - Цэлестыне з роду СулістроўскіхФота © Dominik Abłamowicz
Крыніца:
А.М. Кулагін
Каталіцкія храмы на Беларусі
Мінск, Беларуская Энцыклапедыя, 2000