> Мінская вобласць > Нясвіжскі раён > вёска Вялікая Ліпа > Царква Покрыва Прасвятой Багародзіцы
Вялікая Ліпа. Царква Покрыва Прасвятой Багародзіцы
Вялікая Ліпа. Царква Покрыва Прасвятой Багародзіцы

Царква Покрыва Прасвятой Багародзіцы | Вялікая Ліпа

Выбраныя здымкі

Вялікая Ліпа. Царква Покрыва Прасвятой Багародзіцы

Пакроўская царква ў Вялікай Ліпе, 1773г. Фота © Кузіч Мікола | Дата: 25.09.2010

Вялікая Ліпа. Царква Покрыва Прасвятой Багародзіцы

Царква Покрыва Прасьв. Багародзіцы Фота © К. Шастоўскі | Дата: 25.09.2010

Вялікая Ліпа. Царква Покрыва Прасвятой Багародзіцы

Капліца Фота © Sergej Kondratowicz | Дата: 25.09.2010

Царква стаіць на старадаўніх могілках за 2 км ад вёскі. Пабудавана ў 1773 г. з цэглы, як уніяцкая. У 1896 г. пры царкве пабудавана драўляная царкоўна-прыходская школа. Царква разам з усім пагостам рэканструявана ў 1990-я гг. Прастольнае свята 14 кастрычніка.

Царква - помнік архітэктуры барока. Атрымаў характэрны манументальна-пластычны выгляд, чаму садзейнічаюць буйныя архітэктурныя формы і асабліва — маляўнічае завяршэнне галоўнага фасада ўвагнута-пукатым франтонам, чляненне плоскасных бакавых фасадаў лучковымі праёмамі і арачнымі нішамі. Кампактны прамавугольны ў плане аб'ём пераходзіць у паўкруглую апсіду з бакавымі нізкімі рызніцамі. Вось сіметрыі галоўнага фасада, расчлянёнага лапаткамі на 3 праслы, адзначана лучковымі ўваходным і 2 аконнымі праёмамі. Бляшаны дах над алтарнай часткай завершаны галоўкай-ліхтаром у выглядзе каркаснай гранёнай вежачкі. Інтэр'ер малітоўнай залы вырашаны адзінай прасторай, якая пераходзіць у апсіду, яе бакавыя дзверы вядуць у невялікія рызніцы ў форме скошанага прамавугольніка. Апсіду аддзяляюць бакавыя лапаткі. Пакрыццё плоскае, падшыўная столь на бэльках. Пры ўваходзе ў малітоўную залу на двух калонках размешчаны хоры з балюстраднай агароджай. Дэкаратыўная аздоба інтэр'ера не захавалася.

Перад царквой пастаўлена прамавугольная ў плане мураваная званіца (па суровым характары архітэктуры нагадвае абарончае збудаванне). Цэнтрычная 4-гранная, 2-ярусная, накрытая 4-схільным шатровым дахам. Ніжні ярус мае плоскасныя глухія сцены з прамавугольным уваходным праёмам. Другі ярус-звон ніжэйшы, прарэзаны парнымі прамавугольнымі праёмамі-прасветамі.

Побач з царквой — капліца. Пабудавана ў 19 ст. з цэглы. Капліца - помнік архітэктуры класіцызму. Вырашана 4-граннай цэнтрычнай 2-яруснай вежай, накрытай сплюшчаным купалам на нізкім цыліндрычным барабане. 1-ы глухі ярус крапаваны парнымі філёнгамі, 2-і вырашаны 4 аркамі, дэкараванымі па вуглах калонамі, якія нясуць антаблемент з прафіляваным карнізам. Пад скляпеністым перакрыццем капліцы была пастаўлена культавая скульптура (не захавалася).

Побач размешчана капліца-пахавальня. Пабудавана ў 19 ст. з цэглы. Верагодна, у ёй былі пахаваны прадстаўнікі роду Абуховічаў. Капліца - помнік архітэктуры позняга класіцызму. Невялікі прамавугольны аб'ём пад 2-схільным дахам. Глухія плоскасныя фасады крапаваны па вуглах канеліраванымі пілястрамі, прамавугольны ўваходны праём дэкараваны прафіляваным сандрыкам на фігурных кранштэйнах і нішай-эпітафіяй "Memoriae justorum" над ім.

Увесь комплекс абнесены мураванай агароджай з дэкаратыўнымі "псеўда-сярэднявечнымі" вежамі. Агароджа збудавана у 1833, што пазначана на адным з валуноў.

Крыніца:
А.М. Кулагін
Праваслаўныя храмы на Беларусі
Мінск, Беларуская Энцыклапедыя, 2001

Паведамленні

Год пабудовы (перабудовы): 1773
Каардынаты:
53° 14'33.68"N, 26° 29'57.97"E

Фотагалерэі