Капліца-пахавальня Талочкаў | Ракавіца

Больш фотаздымкаў (26) >>

Род Талочкаў паходзіць з полацкіх баяраў. Першыя ўзгадкі аб Талочках з'яўляюцца ў полацкіх і руска-літоўскіх летапісах XIV-XV стст. У ВКЛ вядомы быў Пятро Талочка (1520-1590 гг.), падсудак троцкі, які пісаў сваё прозьвішча праз адное "л". Ягоны сын Ян быў гродзкім судзьдзёй ў Горадні. Прамы нашчадак Яна Станіслаў Талочка, чашнік жмудзкі, набыў у князя Ігнацыя Шуйскага ў 1730 г. маёнтак Ракавіца з навакольнымі вёскамі, і дадаў да свайго прозьвішча яшчэ адное "л". Па другіх зьвестках у 1740 г. адна з дачок князя Шуйскага выйшла замуж за стольніка ВКЛ Пятра Талочку, і з тае пары да 2-й сусьветнай вайны сядзіба належала па спадчыне Талочкам. За ўдзел Яна Талочкі ў паўстаньні 1863 г. маёнтак павінен быў быць канфіскаваны, але ж ягоныя браты хутка падзялілі маёмасьць і зьбералі Ракавіцу ва ўласнасьці.

Пасьля вяртаньня зь Сыбіры ў Яна Талочкі і Караліны з Ясклоўскіх у 1868 г. нарадзіўся сын Станіслаў, які потым стане вядомым прафэсарам хіміі ў Львоўскім унівэрсітэту. У 1870 г. прыйшоў на гэты сьвет Людвік, пазьней Тэадор і Казімер. Апошнім уладальнікам Ракавіцы быў Тэадор Талочка, які і пабудаваў на радавых могілках у 1908 г. капліцу.