Пятніцкая царква ў Сычах
Царква святой Параскевы Пятніцы ў Сычах пабудавана ўладальнікам маёнтка Іосіфам Высоцкім ў 1822 г. як уніяцкая на месцы ранейшага храма. У Сычах яшчэ ў XVI ст. існавала царква святога Духа, звесткі аб якой сустракаюцца ў Інвентары за 1566 г. Па дадзеных Дзяржаўнага архіву Брэсцкай вобласці царква пабудавана ў 1526 г. Верагодна ў XVIІ ці XVIІІ ст. у Сычах была пабудавана драўляная ўніяцкая царква, на месцы якой ў 1822 г. і быў узвдзены існуючы храм. Да 1960-х гг. у царкве захоўваўся цудадзейны абраз святой Багародзіцы - копія Пачаеўскай Маці Божай, напісаны не пазней за 1698 г. (верагодна захоўваецца ў Музеі старажытнабеларускай культуры ў Мінску).
Пятніцкая царква ў СычахФота © Кузіч Мікола | Дата фота здымкі: 2011/05
Мураваная царква мае кампактны прамавугольны ў плане асноўны аб'ём, накрыты 2-схільным дахам з вальмай над алтарнай часткай. Над ім у цэнтры ўзвышаецца цыбулепадобная галоўка на 8-гранным барабане. Такое ж самае завяршэнне мае ўзведзеная над галоўным уваходам 3-ярусная шатровая званіца. Плоскасныя фасады расчлянёны арачнымі аконнымі праёмамі і пілястрамі ў прасценках, апяразаны прафіляваным карнізам.
Выгляд ад паўночнага захадуФота © Кузіч Мікола | Дата фота здымкі: 2006/09/16
На мяжы XIX і XX стст. сычоўскі прыход налічваў 1486 вернікаў у 3 вёсках: Сычы, Нехалсты і Яцкавічы. Цяпер царква прыпісная да Свята-Пакроўскага прыходу ў Малых Шчытніках.
Крыніца:
1. Гродненский православный календарь
Православие в Брестско-Гродненской земле в конце ХІХ века, Том 1
Воронеж, 1899
2. А.М. Кулагін
Праваслаўныя храмы на Беларусі
Мінск, Беларуская Энцыклапедыя, 2001