Сядзіба Апацкіх | Агарэвічы

Больш фотаздымкаў (18) >>

Сядзіба ў Агарэвічах

Некалі Агарэвічы належылі даволі заможнаму роду Свяржынскіх гербу "Пагоня". У 1-й палове ХVІІІ ст гаспадаром Агарэвіч стаў Міхал Свяржынскі, а з сярэдзіны ХІХ ст. і да 1939 г. Агарэвіцкім дваром валодаў род Апацкіх гербу "Прус". Сядзібна-паркавы ансамбль уключаў драўляны сядзібны дом, мураваную стайню, гумно, парк, сажалкі і ўязную браму на двух мураваных слупах.

У 1-й палове ХІХ стагоддзя Свяржынскія ўзвялі ў Агарэвічах драўляны жылы дом, а новыя гаспадары ў 1911 г. яго значна перабудавалі. Будынак сядзібнага дома аднапавярховы, Г-падобны ў плане, накрыты закругленым з усходняга боку двухсхільным дахам, а з заходняга - паўвальмавым з дэкарыраванымі дахавымі вокнамі.

З усходняга боку дабудавана паўратонда зімовага саду. Ганак галоўнага ўваходу накрыты двухсхільным дахам на чатырох слупах. Планіроўка сядзібнага дома грунтуецца на анфіладнай кампаноўцы рознавялікіх аб'ёмаў вакол двух вестыбюляў. У асобных пакоях захаваліся фрагменты фрэсак і сафітаў.

Паводле даследванняў А.Т. Федарука, парк адносіцца да тыпу рэгулярных перыяду эклектыкі. Ён закладзены прыкладна ў 2-й палове ХІХ ст. на невялікай плошчы. Парадная частка парку мела сімітрычна-восевую кампазіцыю, сістэму сажалак. Асноўную частку яго складаў пладовы сад у выглядзе двух выцягнутых уздоўж кампазіцыйнай восі баскетаў. Сад размешчаны за сядзібным домам. Вось кампазіцыі завяршаецца трэцім баскетам, размешчаным упоперак двух першых.

Цэнтральная алея двухрадная, бакавыя - аднарадныя. Уздоўж іх цягнулася прагулачная сцежка з лінейнай пасадкай кветкавых раслін. У парку шырока прымянялася дэкаратыўная стрыжка дрэў пры фарміраванні алей з елак і габаў. У 1990-я гады пры правядзенні рэканструкцыі ансамбля адбыліся значныя змены ў яго ранейшай сістэме планіроўкі, што прывяло да значнага парушэння кампазіцыі парку.

Паводле:
Л.М. Несцярчук
Замкі, палацы, паркі Берасцейшчыны Х-ХХ стагоддзяў. Мн.: БЕЛТА, 2002