Узнясенская царква ў Агародніках
Царква пабудавана ў 1891 г. на сродкі святара Ігнація Пашкевіча на прыхадскіх могілках, якія размяшчаюцца за 0,5 км на поўнач ад вёскі Агароднікі. Царква з'яўлялась прыпісной да Любашкаўскага прыходу царквы Святога Міхала Арханёла, якая таксама размяшчалася ў вёсцы Агароднікі, на яе заходнім ускрайку. У сучасных даведніках храм памылкова называюць Васкрасенскім, ці Крыжаўзвіжанскім і падаюць недакладны год пабудовы. Паводле даведніка "Гродненский православный календар" за 1899 год царква асвечана ў гонар Узнясення Гасподняга (1891 г.).
Царква Ўзнясення Гасподняга ў АгароднікахФота © Андрэй Дыбоўскі, http://globus.tut.by | Дата: 04/2007
Узнясенская царква ў Агародніках - помнік народнага дойлідства. Трохзрубны храм утвараюць двух’ярусная чатырохгранная прытвор-званіца, малітоўная зала і прамавугольная апсіда з нізкай бакавой рызніцай. Шатровыя дахі званіцы і малітоўнай залы завершаны цыбулепадобнымі галоўкамі на васьмігранных барабанах, вальмае пакрыццё апсіды – крыжом на сферы. Гарызантальна ашаляваныя сцены прарэзаны арачнымі аконнымі праёмамі.