> Брэсцкая вобласць > Камянецкі раён > вёска Баршчэва > Царква Святога Ануфрыя
Баршчэва. Царква Святога Ануфрыя
Баршчэва. Царква Святога Ануфрыя

Царква Святога Ануфрыя | Баршчэва

Ануфрыеўская царква ў Баршчэве

Свята-Ануфрыеўская царква ў Баршчэве стаіць на ўсходняй ускраіне вёскі, каля могілак. Пабудавана ў 1840 г. з мясцовага бутавага каменю на сродкі вернікаў і Пелагеі Грабоўскай, уладальніцы маёнтка. На восі царквы размешчана 2-ярусная шатровая брама-званіца з макаўкай, выкладзеная таксама з бутавага каменю. На мяжы ХІХ-ХХ стст. да царквы адносілася 1774 прыхаджан з 5 вёсак: Баршчэва, Забалацце, Мінкавічы, Мураўчыцы і Хацінава.

Баршчэва - Царква Святога Ануфрыя

Ануфрыеўская царква ў БаршчэвеФота © К. Шастоўскі | Дата: 09/07/2005

Царква — помнік мураванага дойлідства. Вырашана кампактным прамавугольным у плане аб'ёмам пад 2-схільным дахам. На галоўным фасадзе вылучаецца рызаліт прытвора, на тыльным — прамавугольная апсіда з бакавымі рызніцамі. Плоскасныя фасады раскрапаваны руставанымі лапаткамі і прарэзаны прамавугольнымі аконнымі праёмамі, апяразанымі ліштвамі з замковымі камянямі. Атынкоўка і пабелка архітэктурнага дэкору кантрастна вылучае яго на фоне паліхромнай бутавай муроўкі сцен. Бляшаны дах па цэнтры завершаны 2-ярусным 8-гранным барабанам з цыбулепадобным купалам. Прамавугольны ўваходны праём і паўкруглая люкарна над ім вылучаны атынкаванымі ліштвамі.

Брама-званіца

Брама-званіцаФота © Кузіч Мікола | Дата: 13/05/2012

Унутраная прастора храма 3 парамі драўляных слупоў размежавана на 3 нефы. Апсіда вылучана драўляным разным іканастасам з паўкруглай салеяй перад ім. Над уваходам кансольна выступаюць хоры.

Да царквы прыпісана могілкавая капліца Святога апостала Фамы, пабудаваная ў 2000-я гг. Папярэдняя могілкавая царква, Параскевы-Пятніцкая, была пабудавана ў 1874 г.

Літ.:
1. А.М. Кулагін
Праваслаўныя храмы на Беларусі
Мінск, Беларуская Энцыклапедыя, 2001
2. Гродненский православный календарь
Православие в Брестско-Гродненской земле в конце ХІХ века, Том 1
Воронеж, 1899

Паведамленні

Год пабудовы (перабудовы): 1840
Фундацыя: Пелагея Грабоўская
Каардынаты:
52° 21'20.80"N, 23° 30'32.21"E
ДСГКК Беларусі: 113Г000329

Фотагалерэі