Сядзібна-паркавы ансамбль Ажэшкаў | Белін

Сядзіба Ажэшкаў Белін

У сярэдзіне XIX ст. Пётр Ажэшка (1825 — каля 1874), які не меў у родавым Людвінове вялікага палаца, вырашыў адбудаваць у адным са сваіх фальварка над Каралеўскім (сучасным Дняпроўска-Бугскім) каналам каля вёскі Белін рэпрэзентатыўны палацык у выглядзе арыгінальнага невялікага замка з рысамі неаготыкі.

У 1864 г. у Белін прыязджаў Напалеон Орда і замаляваў Белінскі палацык. Будынак узведзены ў нерэгулярным стылі. меў аднапавярховы і двухпавярховы аб'ёмы. Асаблівую прыгажосць яму надавала двухпавярховая вежка. Замачак меў некалькі балконаў, з якіх адкрываўся від на старадаўні англійскі парк. Пётр Ажэшка і ягоная жонка, вядомая пісменніца Эліза Ажэшка (з Паўлоўскіх), не паспелі перасяліцца ў новую рэзідэнцыю, таму што па заканчэнні будаўніцтва за ўдзел у нацыянальна-вызваленчым паўстанні ў 1863 г. Пётр быў арыштаваны і сасланы ў Пермскую губерню.

Белін і суседні двор Людвінова былі канфіскаваны ў Ажэшкі і перададзены ва ўласнасць расійскага памешчыка Кантарава. Пасля 1-й сусветнай вайны Белін занялі польскія ваенныя асаднікі. Каля 1925 г. гэтыя землі набыў Караль Талочка, які зрабіў спробу аднавіць замачак Ажэшкаў, які на гэты час быў моцна пашкоджаны. Рэстаўрацыя не адбылася, зямля была распрададзена на часткі і новыя гаспадары надзелаў Белінскага маёнтка разабралі замачак на цэглу, а старадаўні парк быў высечаны.