Кальвінскі збор | Асташын

Кальвінскі збор у Асташыне пабудаваны ў 17 ст. па фундацыі Швыкоўскіх. Тут знаходзілася і крыпта з трунамі фундатараў. Мураваны помнік не захаваўся і амаль не даследаваны. Даследчыкі карыстаюцца пераважна фотаздымкам храма зробленым Янам Булгакам у 1910-х г. і апублікаваным у розных выданнях. Кальвінскі збор вызначаўся кампактнасцю архітэктурных форм, складаўся з асноўнага аб'ёму, накрытага высокім клінаватым дахам, і масіўнай чацверыковай вежы з боку ўвахода. Вышыні асноўнага аб'ёму адпавядалі два ніжнія ярусы вежы. Два верхнія інтэнсіўна скарачаліся па памерах і па вышыні, закрываючы тарэц даху, а не ўзвышаючыся над ім. Такі прыём рабіў кампазіцыю будынка важкавата-прысадзістай і адначасова поўнай унутранай энергіі. Паводле вельмі ўмоўнага плана асташынскага кальвінскага збора, апублікаванага У. Чантурыя, можна канстатаваць, што будынак меў трохгранную ўсходнюю сцяну, а не алтарную апсіду. Храм нязначна пашкоджаны ў другую сусветную вайну і канчаткова разбураны мясцовымі ўладамі ў 1950-я г.

Літ.:
Т.В. Габрусь
Мураваныя харалы
Мінск, "Ураджай", 2001