Царква Святога Аляксандра Неўскага | Кобрын

Больш фотаздымкаў (13) >>

Свята-Аляксандра-Неўскі сабор у Кобрыне, размешчаны на вуліцы Леніна, 18 (былыя Замкавы пляц, вуліца Бабруйская). Пабудаваны ў 1864—1868 гг. з цэглы з нагоды адмены прыгоннага права і на ўшанаванне памяці расейскіх вайскоўцаў, што загінулі ў час бою пад Кобрынам 15 ліпеня 1812 г. Праект і каштарыс быў складзены губернскім архітэктарам І. Калянкевічам і адобраны ў 1864 г. Меўся мясцовашанаваны абраз «Маці Божая», перанесены са старажытнай Свята-Прачысценскай царквы г. Кобрына.

У 1964 г. царква закрыта і прыстасавана пад філіял Дзяржаўнага архіва Брэсцкай вобласці. Рэстаўрацыя храма праведзена ў 1990—1993 гг. Асвячоны 12 верасня 1990 г. ў дзень памяці Аляксандра Неўскага.

Помнік мае элементы стылю класіцызму. Асноўны аб'ём крыжова-цэнтрычны, завершаны магутным васьмерыковым барабанам, які ў апошнія гады «падтрыманы» 4 вуглавымі аналагічнай формы шатровымі барабанамі, што стварыла маляўнічае 5-купалле. Да планіровачнага крыжа далучаюцца выцягнуты прытвор з вуглавымі прыдзеламі і прамавугольная апсіда з бакавымі партатыўнымі квадратнымі рызніцамі.

Плоскасныя фасады завершаны 3-вугольнымі франтонамі, крапаваны вуглавымі лапаткамі і прамавуголь-нымі панэлямі, апяразаны фрызам, арачныя вокны акаймаваны архівольтамі. Галоўны ўваход аформлены накладным магутным парталам з лучковым франтонам і арачнай ліштвай увахода. У сяродкрыжжа залы шырокімі прасветамі адкрываюцца апсіда, прыдзелы і трапезпая. Сяродкрыжжа перакрыта купалам на ветразях, астатнія памяшканні — цыліндрычнымі скляпеннямі на распалубках. На саборы ўстаноўлена мемарыяльная дошка.

Літ.:
А.М. Кулагін
Памяць. Кобрынскі раён
Мінск, Белта, 2002