Капліца каталіцкая | Нароўля

З ХVІІІ стагоддзя Нароўля ўзгадваецца ў гістарычных дакументах як мястэчка, якое належала славутаму роду Аскеркаў. Пасля другога падзелу Рэчы Паспалітай у 1793 г. Нароўля ўвайшла ў склад Расійскай імперыі і стала цэнтрам воласці Рэчыцкага павету Мінскай губерні. У Нароўлі і навакольных вёсках – Аляксандраўка, Грушаўка, Габрылееўка, Мальцы, Лубень, Свяча, Чэхі Галоўчыцкія – спрадвеку жылі католікі. З канца ХІХ ст. у цэнтры мястэчка (на беразе Прыпяці) стаяла мураваная капліца. Але ў 1919 г. у Мазырскае Палессе прыйшла савецкая ўлада, і горад увайшоў у склад Гомельскай губерні РСФСР, а з 1924 г. — у склад БССР. У часы таталітарнага атэістычнага рэжыму, пачаліся пераследванні за веру. Капліца была знішчана. Вызнаваць хрысціянства стала небяспечным. Вернікі маліліся па хатах, зрэдку траплялі ў касцёл.

Рэлігійнае жыццё пачало адраджацца ў 1990 г., а ў 1991 г. у Нароўлі была зарэгістравана рыма-каталіцкая парафія. Яе пробашчам стаў ксёндз Станіслаў Салата. Парафіі аддалі будынак былога аддзела міліцыі: перакошаныя сцены, выламаныя дзверы, выбітыя вокны і горы смецця. Але гэта не спалохала парафіянаў і пробашча. Яны пачалі рамонт, і праз некаторы час сталі адбывацца набажэнствы ў сціплай, але па-хатняму ўтульнай капліцы. Ксёндз Станіслаў не спыніўся на гэтым — ён марыў аб прыгожым касцёле. Пачалося будаўніцтва. З дапамогай вернікаў з Германіі і Польшчы паўстала новая святыня. Незабыўным момантам у жыцці парафіі стала асвячэнне кардыналам Казімірам Свёнткам касцёла Святога Крыжа, якое адбылося 20 верасня 1998 г.

Catholic.by